கோலாலம்பூர், நவ.14: கோலா சிலாங்கூர் மாவட்டத்தில் வெள்ளத்தால் பாதிக்கப்பட்டு தற்காலிக நிவாரண மையங்களில் தங்கியுள்ளவர்களின் எண்ணிக்கை இன்று மாலை 4 மணி நிலவரப்படி 1,511-ஆக அதிகரித்துள்ளது.
இன்று காலை 8 மணி நிலவரப்படி 1,498 பேர் மட்டுமே நிவாரண மையங்களில் தங்கியிருந்த நிலையில், தற்போது இந்த எண்ணிக்கை 13 பேரால் அதிகரித்துள்ளது.
சமூக நலத்துறையின் இன்ஃபோபென்சானா (InfoBencana) இணையவழித் தகவல் தளத்தின்படி, கோலா சிலாங்கூர் மாவட்டத்தில் மொத்தம் 7 தற்காலிக நிவாரண மையங்கள் செயல்பட்டு வருகின்றன.
இதற்கிடையில், பேராக் மாநிலத்தின் ஹிலிர் பேராக் மாவட்டத்தில் வெள்ளத்தால் பாதிக்கப்பட்டு நிவாரண மையங்களில் தங்கியுள்ளவர்களின் எண்ணிக்கை குறைந்துள்ளது.
இன்று காலை 265-ஆக இருந்த எண்ணிக்கை பிற்பகலில் 227-ஆகக் குறைந்துள்ளதாக மாநிலப் பேரிடர் நிர்வாகக் குழுவின் (JPBN) செயலகம் தெரிவித்தது.
மேலும், தெலுக் இந்தான் நகராட்சி மன்றத்தின் (MPTI) லங்காப் ஓய்வு மண்டபத்தில் செயல்பட்டு வந்த தற்காலிக நிவாரண மையம், இன்று பிற்பகல் 3 மணிக்கு மூடப்பட்டது.







