கனமழையால் சிலாங்கூரில் 1,120 பேர் நிவாரண மையங்களில் தஞ்சம்

6 நவம்பர் 2026, 2:52 AM
கனமழையால் சிலாங்கூரில் 1,120 பேர் நிவாரண மையங்களில் தஞ்சம்

ஷா ஆலாம், நவ.6: சிலாங்கூர் முழுவதும் பெய்த கனமழையைத் தொடர்ந்து ஏற்பட்ட வெள்ளத்தால் பாதிக்கப்பட்ட 286 குடும்பங்களைச் சேர்ந்த 1,120 பேர் 9 நிவாரண மையங்களில் தஞ்சமடைந்துள்ளனர்.

நேற்று இரவு 11.30 மணி நிலவரப்படி, கோலா சிலாங்கூர், ஷா ஆலாம் மற்றும் கிள்ளான் ஆகிய மூன்று பகுதிகளில் இந்த நிவாரண மையங்கள் செயல்பட்டு வருவதாகத் தெரிவிக்கப்பட்டது.

சமூக நலத்துறையின் (JKM) `Info Banjir` இணையத்தளத்தில் வெளியிடப்பட்டுள்ள தகவலின்படி, கோலா சிலாங்கூரில் 4 நிவாரண மையங்கள் திறக்கப்பட்டுள்ளன. அங்கு 187 குடும்பங்களைச் சேர்ந்த 734 பேர் தங்க வைக்கப்பட்டுள்ளனர்.

இந்நிவாரண மையங்கள் இஜோக் உட்பிரிவில் உள்ள தேசியப் பள்ளி (SK) டேசா அமானா, தேசியப் பள்ளி ஜெயா செத்தியா மற்றும் பத்து 8 இஜோக் சமயப் பள்ளி ஆகியவற்றிலும், ஜெராம் பகுதியில் உள்ள தேசியப் பள்ளி டத்தோ மஹாராஜா லேலாவிலும் அமைக்கப்பட்டுள்ளன.

இதற்கிடையில், ஷா ஆலாம் பகுதியில் 4 நிவாரண மையங்கள் திறக்கப்பட்டுள்ளன. அவற்றில் 82 குடும்பங்களைச் சேர்ந்த 369 பேர் தங்க வைக்கப்பட்டுள்ளனர்.

அந்த வகையில், பாயா ஜாராஸில் உள்ள தேசியப் பள்ளி மெர்பாவ் செம்பாக், கம்போங் பாயா ஜாராஸ் U19 பகுதியில் அமைந்துள்ள டேவான் செரி பகி மற்றும் பெட்டாலிங் மாவட்ட, நில அலுவலக வளாகத்தில் உள்ள கெனாங்கா மண்டபத்திலும், கோத்தா டாமான்சாரா பகுதியில் உள்ள டேவான் சியாந்தான் கம்போங் மெலாயு சுபாங் மண்டபத்திலும் வெள்ளத்தால் பாதிக்கப்பட்டவர்கள் தஞ்சம் அடைந்துள்ளனர்.

அதேவேளை, கிள்ளான் மாவட்டத்தில் கடந்த வியாழக்கிழமை ஒரே ஒரு நிவாரண மையம் திறக்கப்பட்டுள்ளது. செமெந்தாவில் அமைந்துள்ள டேவான் மஸ்ஜிட் அல்-தக்வா புக்கிட் காப்பாரில் செயல்படும் அந்த மையத்தில் 17 பேர் தங்கியுள்ளனர்.

இதனிடையே, கிள்ளான், பெக்கான் மெருவில் உள்ள சுங்கை பின்ஜாய் ஆற்றின் நீர்மட்டம் எச்சரிக்கை அளவைத் தாண்டியுள்ளது.

நேற்று இரவு 11.15 மணி நிலவரப்படி, அந்த ஆற்றின் நீர்மட்டம் 4.14 மீட்டராகப் பதிவாகியுள்ளது.

மேலும், கிள்ளான், தாமான் டேசா கெமுனிங்கில் உள்ள சுங்கை ராசாவ் ஆற்றின் நீர்மட்டமும் எச்சரிக்கை அளவைத் தாண்டி 2.87 மீட்டராக உயர்ந்துள்ளது.

கோலா சிலாங்கூர், பாரிட் மஹாங்கில் உள்ள சுங்கை பூலோ ஆற்றின் நீர்மட்டம் 4.05 மீட்டராகப் பதிவாகி எச்சரிக்கை நிலையை எட்டியுள்ளது.

வகைselangor

உங்கள் கருத்து என்ன?

அண்மைய செய்திகள்
Media Selangor
எங்களைப் பற்றி

Media Selangor Sdn Bhd என்பது சிலாங்கூர் மந்திரி பெசார் கழகத்தின் (MBI) துணை நிறுவனம் ஆகும். இது மாநில அரசின் ஊடக ஏஜென்ஸியாக செயல்படுகிறது. Selangorkini மற்றும் SelangorTV ஆகியவற்றுடன் கூட, இந்த நிறுவனம் சீனம், தமிழும் மற்றும் ஆங்கிலத்திலும் இணையதளங்கள் மற்றும் பத்திரிகைகளை வெளியிடுகிறது.