ஷா ஆலாம், நவ.4: இன்று அதிகாலை தொடர்ந்து பெய்த கனமழை காரணமாக ஷா ஆலாம் மற்றும் அதனைச் சுற்றியுள்ள பல பகுதிகளில் திடீர் வெள்ளம் ஏற்பட்டது. இதனால் முக்கிய சாலைகள் சிலவற்றில் வெள்ளநீர் தேங்கியுள்ளதுடன், வாகனப் போக்குவரத்தும் கடுமையாகப் பாதிக்கப்பட்டுள்ளது.
குறிப்பாக, செக்ஷன் 13, செத்தியா ஆலாம் மற்றும் செக்ஷன் 22 ஆகிய பகுதிகளில் வெள்ளம் ஏற்பட்டுள்ளதாக சமூக ஊடகமான Threads தளத்தில் பயனர்கள் பகிர்ந்துள்ளனர்.
Threads பயனரான slyuza, செக்ஷன் 13-இல் உள்ள ஜெயன்ட் பேரங்காடிக்கு முன்னால் சாலையில் வெள்ளநீர் தேங்கியுள்ளதாகத் தெரிவித்துள்ளார். அந்த வழியாகச் செல்லும் வாகனமோட்டிகள் மிகுந்த கவனத்துடன் பயணிக்குமாறும் அவர் எச்சரித்துள்ளார்.
இதற்கிடையில், மற்றொரு Threads பயனரான amiruddinsya_ இன்று அதிகாலை 5 மணியளவில் வெளியிட்ட பதிவில், செத்தியா ஆலாம் மற்றும் ஷா ஆலாம் இடையிலான புதிய கிள்ளான் பள்ளத்தாக்கு விரைவுச்சாலையின் (NKVE) இரு திசைகளிலும் வெள்ளம் காரணமாக மூடப்பட்டுள்ளதாகத் தெரிவித்தார்.
அதேபோன்று, அதிகாலை 3.30 மணியளவில் பதிவிட்ட nazriahm.ad என்ற பயனர், செக்ஷன் 13-ஐச் சுற்றியுள்ள நெடுஞ்சாலைகளும் தொடர்ந்து மூடப்பட்டிருந்ததாகக் குறிப்பிட்டார். இதனால் இன்று காலை அலுவலகம் செல்லும் நேரத்தில் கடுமையான போக்குவரத்து நெரிசல் ஏற்படக்கூடும் என்றும் அவர் முன்னெச்சரிக்கை விடுத்திருந்தார்.
மேலும், faraamcl என்ற Threads பயனர், இன்று காலை பொதுமக்கள் வேலைக்குச் செல்லத் தொடங்கிய நேரத்தில், ஷா ஆலாம் சுங்கச்சாவடியை நோக்கிச் செல்லும் NKVE (E1) நுழைவுப் பாதையில் கடுமையான போக்குவரத்து நெரிசல் ஏற்பட்டுள்ளதாகப் பகிர்ந்துள்ளார்.
இதனிடையே, எக்ஸ் (X) தளத்தில் @plustrafik என்ற அதிகாரப்பூர்வ கணக்கு வாயிலாக PLUS மலேசியா வெளியிட்டுள்ள அண்மைய தகவலின்படி, கத்ரி விரைவுச்சாலையில் (GCE) இருந்து ஷா ஆலாம் சுங்கச்சாவடியை நோக்கிச் செல்லும் பாதை திடீர் வெள்ளம் காரணமாக மூடப்பட்டுள்ளது.
இதனால், அந்த வழியாகப் பயணிக்கத் திட்டமிட்டுள்ள வாகனமோட்டிகள் மாற்றுப் பாதைகளைப் பயன்படுத்துமாறு அறிவுறுத்தப்பட்டுள்ளனர்.
இருப்பினும், சீஃபீல்டில் இருந்து செத்தியா ஆலாம் நோக்கிச் செல்லும் மத்திய இணைப்பு வடக்கு-தெற்கு விரைவுச்சாலையின் (ELITE) ஷா ஆலாம் சந்திப்பில், நேற்று இரவு முதல் மூடப்பட்டிருந்த அனைத்துப் பாதைகளும் தற்போது மீண்டும் போக்குவரத்திற்காகத் திறக்கப்பட்டுள்ளன.
எனினும், அந்தப் பகுதியில் பயணிக்கும் வாகனமோட்டிகள் தொடர்ந்து எச்சரிக்கையுடன் வாகனங்களைச் செலுத்துமாறு கேட்டுக்கொள்ளப்பட்டுள்ளனர்.
