இந்தோனேசியா காட்டுத் தீ: ஜப்பான் உட்பட 97 நிறுவனங்கள் மீது விசாரணை

30 அக்டோபர் 2026, 3:12 AM
இந்தோனேசியா காட்டுத் தீ: ஜப்பான் உட்பட 97 நிறுவனங்கள் மீது விசாரணை
இந்தோனேசியா காட்டுத் தீ: ஜப்பான் உட்பட 97 நிறுவனங்கள் மீது விசாரணை

டோக்கியோ, அக்.30 – இந்தோனேசியாவின் பல தீவுகளில் தொடர்ந்து பரவி வரும் காட்டுத் தீ சம்பவங்களுடன் தொடர்புடையதாகச் சந்தேகிக்கப்படும் 97 உள்நாட்டு மற்றும் வெளிநாட்டு நிறுவனங்கள் மீது அந்நாட்டுக் காவல்துறை விசாரணை மேற்கொண்டு வருகிறது.

இந்த விசாரணைக்கு உட்படுத்தப்பட்டுள்ள நிறுவனங்களில் ஜப்பானிய நிறுவனமொன்றின் துணை நிறுவனமும் அடங்கும் என கியோடோ செய்தி நிறுவனம் தெரிவித்துள்ளது.

ஜப்பானிய நிறுவனத்துடன் மேலும் 21 வெளிநாட்டு நிறுவனங்களும் விசாரணைக்கு உட்படுத்தப்பட்டுள்ளதாக இந்தோனேசிய தேசியக் காவல்துறையின் குற்றப் புலனாய்வுப் பிரிவுத் தலைவர் அசெப் சஃப்ருடின் கூறினார்.

மேற்கு கலிமந்தானில் நேற்று இணையவழி நேரலை செய்தியாளர் சந்திப்பில் பேசிய அவர், விசாரணைக்கு உட்படுத்தப்பட்டுள்ள மொத்தம் 97 நிறுவனங்களில் 23 நிறுவனங்களின் வர்த்தக உரிமங்களை ரத்து செய்யுமாறு அரசுக்கு காவல்துறை கோரிக்கை விடுத்துள்ளதாகவும் குறிப்பிட்டார்.

எனினும், அந்த 23 நிறுவனங்களின் பெயர்கள் குறித்த விவரங்களை அவர் வெளியிடவில்லை.

இந்த நிறுவனங்களுக்குச் சொந்தமான அல்லது அவற்றின் கட்டுப்பாட்டில் உள்ள பகுதிகளில் (Concession Areas) இந்த ஆண்டின் தொடக்கத்திலிருந்தே தீ விபத்துகள் அடிக்கடி நிகழ்ந்து வருவதாகவும் அசெப் சஃப்ருடின் சுட்டிக்காட்டினார்.

இதற்கிடையில், கடந்த ஆகஸ்ட் மாதம் முதல் இந்தோனேசியாவின் போர்னியோ, சுமத்ரா, சுலவேசி, மாலுகு மற்றும் பப்புவா தீவுப் பகுதிகளில் பெருமளவிலான காட்டுத் தீ சம்பவங்கள் பதிவாகி வருகின்றன.

இந்தத் தீ விபத்துகளால் அப்பகுதிகளில் காற்றின் தரம் வெகுவாகப் பாதிக்கப்பட்டுள்ளதுடன், புகைமூட்டம் காரணமாகப் பொதுமக்களின் அன்றாட வாழ்க்கையும் பெரிதும் பாதிக்கப்பட்டுள்ளது.

காற்றில் பரவியுள்ள அடர்த்தியான புகைமூட்டத்தால் பல பள்ளிகள் நேரடி வகுப்புகளைத் தற்காலிகமாக நிறுத்திவிட்டு இணையவழிக் கல்விக்கு மாற வேண்டிய சூழ்நிலை ஏற்பட்டுள்ளது.

மேலும், காட்டுத் தீயிலிருந்து வெளியேறும் புகை மற்றும் நச்சுத் துகள்கள் மக்களின் சுகாதாரத்திற்கும் பாதிப்பை ஏற்படுத்தியுள்ளன. பாதிக்கப்பட்ட தீவுகளில் வசிக்கும் ஏராளமானோர் சுவாசப் பிரச்சனைகளுக்கு உள்ளாகியுள்ளனர்.

வகைantarabangsa

உங்கள் கருத்து என்ன?

அண்மைய செய்திகள்
Media Selangor
எங்களைப் பற்றி

Media Selangor Sdn Bhd என்பது சிலாங்கூர் மந்திரி பெசார் கழகத்தின் (MBI) துணை நிறுவனம் ஆகும். இது மாநில அரசின் ஊடக ஏஜென்ஸியாக செயல்படுகிறது. Selangorkini மற்றும் SelangorTV ஆகியவற்றுடன் கூட, இந்த நிறுவனம் சீனம், தமிழும் மற்றும் ஆங்கிலத்திலும் இணையதளங்கள் மற்றும் பத்திரிகைகளை வெளியிடுகிறது.