மலாக்கா, அக். 18 – கடந்த ஆகஸ்ட் மாதம் நேபாளத்தில் ஏற்பட்ட வெள்ளம் மற்றும் நிலச்சரிவைத் தொடர்ந்து தொடர்புகொள்ள முடியாமல் இருக்கும் 54 மலேசியர்களுக்கு விரைவாக இறப்புச் சான்றிதழ்களை வழங்குவதற்காக, அந்நாட்டின் சட்டத்தில் திருத்தம் செய்வதற்கான முயற்சிகளை நேபாள அரசாங்கம் மேற்கொண்டு வருகிறது.
இதனை மலேசிய வெளியுறவு அமைச்சர் டத்தோ ஸ்ரீ முகமட் ஹசான் தெரிவித்தார்.
தற்போதைய நேபாளச் சட்டத்தின்படி, பேரிடர் ஒன்றைத் தொடர்ந்து காணாமல் போனவர்களைக் கண்டறிய முடியாத நிலையில், அவர்களுக்கான இறப்புச் சான்றிதழை வழங்குவதற்கு மூன்று ஆண்டுகள் வரை காத்திருக்க வேண்டியுள்ளதாக அவர் கூறினார்.
கடந்த வாரம் நேபாளத் தூதரகப் பிரதிநிதிகள் தமது அலுவலகத்திற்கு வருகை தந்தபோது இந்த விவகாரம் குறித்து விளக்கமளித்ததாக முகமட் ஹசான் தெரிவித்தார்.
இந்தச் சட்டத்தில் திருத்தம் செய்வதற்கான முயற்சிகளை நேபாள அரசாங்கம் மேற்கொண்டு வருகிறது. அதற்கான திருத்தத்தை அந்நாட்டு நாடாளுமன்றத்தில் சமர்ப்பிக்கவும் திட்டமிட்டுள்ளது.
சட்டத் திருத்தத்தை உடனடியாக மேற்கொள்ள முடியாவிட்டாலும், தொடர்புகொள்ள முடியாமல் இருக்கும் 54 மலேசியர்களுக்கும் விரைவாக இறப்புச் சான்றிதழ்களை வழங்குவதற்கு ஏதுவாகச் சிறப்பு ஏற்பாடு ஒன்றைச் செய்வதற்கும் முயற்சி மேற்கொள்ளப்படும் என முகமட் ஹசான் கூறினார்.
மலாக்காவில் இன்று நடைபெற்ற தேசிய ஒற்றுமைச் சங்கத்தின் (PerSoNa) 10ஆவது தேசியப் பேரவைக் கூட்டத்தின் 2025ஆம் ஆண்டுக்கான அமர்வு நிறைவு விழாவை அதிகாரப்பூர்வமாகத் தொடங்கி வைத்த பின்னர் செய்தியாளர்களிடம் பேசிய அவர் இதனைத் தெரிவித்தார்.
காணாமல் போனவர்களின் குடும்பத்தினர் வங்கிப் பரிவர்த்தனைகள், காப்புறுதி கோரிக்கைகள் உள்ளிட்ட பல்வேறு சட்ட மற்றும் நிர்வாக நடவடிக்கைகளை முன்னெடுப்பதற்கு இறப்புச் சான்றிதழ்கள் மிகவும் அவசியமானவை என்றும் அவர் சுட்டிக்காட்டினார்.
சுமத்ரா, கலிமந்தானில் காட்டுத்தீ: உதவி வழங்குவது குறித்து ஆலோசனை
இதற்கிடையில், இந்தோனேசியாவின் சுமத்ரா மற்றும் கலிமந்தான் பகுதிகளில் பரவி வரும் காட்டுத்தீயைக் கட்டுப்படுத்த உதவுவதற்கான சாத்தியக்கூறுகள் குறித்து, தேசியப் பேரிடர் மேலாண்மை முகமை (NADMA) மற்றும் தேசியப் பாதுகாப்பு மன்றம் (MKN) ஆகியவற்றின் கூட்ட முடிவுகளுக்காக மலேசியா காத்திருப்பதாக முகமட் ஹசான் தெரிவித்தார்.
இந்தக் கூட்டங்களில் எடுக்கப்படும் முடிவுகள் அமைச்சரவையின் ஒப்புதலுக்காகச் சமர்ப்பிக்கப்படும் என்றும் அவர் கூறினார்.
எனினும், காட்டுத்தீயைக் கட்டுப்படுத்தும் நடவடிக்கைகளுக்கு அப்பகுதிகளின் தொலைதூர அமைவிடமும் அடர்த்தியான புகைமூட்டமும் பெரும் சவால்களாக இருப்பதாக அவர் குறிப்பிட்டார்.
காட்டுத்தீயைக் கட்டுப்படுத்துவதற்கு வான்வழி உதவிகளை வழங்குவது குறித்து முடிவெடுக்கும் முன்பு, விமானிகள் மற்றும் மீட்புப் பணியாளர்களின் பாதுகாப்புக்கு முன்னுரிமை அளிக்கப்படும் என்றும் அவர் வலியுறுத்தினார்.
நிலைமை ஆபத்தானதாக இருக்கும்போது விமானிகளைப் பணியில் ஈடுபடுமாறு மலேசியா உத்தரவிடாது என்றும், எந்தவொரு உதவி நடவடிக்கையும் பாதுகாப்பு அம்சங்களை முழுமையாக மதிப்பீடு செய்த பின்னரே தீர்மானிக்கப்படும் என்றும் அவர் கூறினார்.
இத்தாலி, பிரான்ஸ் செல்லும் மலேசியர்கள் எச்சரிக்கையுடன் இருக்க அறிவுறுத்தல்
இதனிடையே, இத்தாலி மற்றும் பிரான்ஸ் நாடுகளுக்குப் பயணம் மேற்கொள்ளும் மலேசியர்கள், ஆர்ப்பாட்டங்கள் நடைபெறும் பகுதிகள் மற்றும் போராட்டக்காரர்கள் அதிகம் கூடும் இடங்களைத் தவிர்க்க வேண்டும் என்றும் முகமட் ஹசான் அறிவுறுத்தினார்.
தற்போது அந்த இரு நாடுகளுக்கும் செல்வதற்கு எவ்விதப் பயணத் தடையும் விதிக்கப்படவில்லை என்றாலும், மலேசியர்கள் தொடர்ந்து விழிப்புடன் இருப்பதுடன், அந்நாட்டு அதிகாரிகள் வெளியிடும் பாதுகாப்பு அறிவுறுத்தல்களையும் முறையாகப் பின்பற்ற வேண்டும் என்று அவர் கேட்டுக்கொண்டார்.
