கோலாலம்பூர், அக் 24 : சமூகம் எத்தகைய பரிணாம வளர்ச்சியைக் கண்டிருந்தாலும், அரசியலமைப்புச் சட்டத்திற்குட்பட்ட ஒரு மன்னரின் அடிப்படைப் பங்கு மாறாமல் அப்படியேதான் இருக்கிறது என்று சிலாங்கூர் சுல்தான், சுல்தான் ஷரஃபுடின் இட்ரிஸ் ஷா தெரிவித்தார்.
அரசியலமைப்புச் சட்டத்தை நிலைநிறுத்துவதும், நாட்டின் தொடர்ச்சியைப் பாதுகாப்பதும், அரசியல் வேறுபாடுகளுக்கு அப்பாற்பட்ட ஒற்றுமையின் அடையாளமாகத் திகழ்வதும், ஒரு மன்னரின் பொறுப்பாகும் என்று சுல்தான் குறிப்பிட்டார்.
சிலாங்கூர் அரியணையில் அமர்ந்து 25 ஆண்டுகள் நிறைவடைந்ததையொட்டி வழங்கிய சிறப்பு நேர்காணலில் அவர் இவ்வாறு பேசினார்.
"மாற்றங்கள் நிகழும் காலகட்டங்களில் அரசமைப்பு நாட்டிற்கு நிலைத் தன்மையை வழங்குகிறது. அத்துடன், தேசிய நல்லிணக்கத்தைப் பாதுகாப்பதில் அரசமைப்பு தொடர்ந்து முக்கியப் பங்காற்றி வருகின்றது" என்று கூறினார்.
"சிலாங்கூர் மக்கள் அனைவருக்கும் எந்தவிதப் பாகுபாடோ அல்லது பாரபட்சமோ இன்றி சேவை செய்வதே எமது பொறுப்பு" என்றும் சுல்தான் உறுதியளித்தார்.
அரசியலமைப்புச் சட்டக் கோட்பாடுகளுக்கான மரியாதை, நடுநிலைமை மற்றும் நேர்மை ஆகியவைதான், குடிமக்களின் பின்னணி அல்லது அரசியல் நம்பிக்கைகள் எதுவாக இருந்தாலும், அரசமைப்பு முறையை அவர்கள் அனைவரும் நம்பக்கூடிய ஒரு பொதுவான அமைப்பாகத் தொடர்ந்து நீடிக்கச் செய்கிறது என்றும் சுல்தான் சுட்டிக்காட்டினார்.
"தலைமைத்துவம் என்பது சலுகைகளைத் தருவதல்ல, மாறாகப் பெரும் கடமைகளைத் தாங்கி நிற்பது என்பதை அது நமக்கு நினைவூட்டுகிறது" என்றார்.
