சிலாங்கூரில் காற்றுத் தரம் மோசம்; ஜோஹான் செத்தியாவில் உச்சம்

ஷா ஆலம், அக் 7: சிலாங்கூரின் பல பகுதிகளில் தொடர்ந்து நிலவி வரும் ஆரோக்கியமற்ற காற்றின் தரத்தைத் தொடர்ந்து, இன்று காலை 9 மணி நிலவரப்படி ஜோஹான் செத்தியா (Johan Setia) 190 என்ற புள்ளிகளுடன் மாநிலத்தின் மிக உயர்ந்த காற்று மாசடைவுக் குறியீட்டை (IPU) பதிவு செய்தது.

காற்று மாசடைவுக் குறியீட்டு நிர்வகிப்பு அமைப்பின் (APIMS), இணையப் பக்கத்தின்படி, ஜோஹான் செத்தியாவின் 190 என்ற இந்த குறியீடு, ஜொகூரில் உள்ள பத்து பஹாட் (Batu Pahat) பகுதியுடன் இணைந்து நாடு தழுவிய அளவில் பதிவான மிக உயர்ந்த IPU அளவாக உள்ளது.

கோலாலம்பூரில் உள்ள செராஸ் (Cheras) மற்றும் நெகிரி செம்பிலானில் உள்ள நிலாய் (Nilai) ஆகிய பகுதிகள் தலா 189 புள்ளிகளையும், புத்ராஜெயா (Putrajaya) 187 புள்ளிகளையும் பதிவு செய்துள்ளன.

சிலாங்கூரில், ஷா ஆலம் (Shah Alam) 180 புள்ளிகளுடன் இரண்டாவது மிக உயர்ந்த அளவைப் பதிவு செய்துள்ளது.

அதைத் தொடர்ந்து பெட்டாலிங் ஜெயா (Petaling Jaya) மற்றும் பந்திங் (Banting) தலா 176 புள்ளிகளையும், கிள்ளான் (Klang) 169 புள்ளிகளையும் பதிவு செய்து, அனைத்தும் ஆரோக்கியமற்ற பிரிவில் உள்ளன.

இதற்கிடையில், திரெங்கானுவின் கெமாமான் (Kemaman) மற்றும் பகா (Paka) ஆகிய இடங்களில் தலா 156 புள்ளிகளும், சபாவின் தாவாவ் (Tawau) இல் 155 புள்ளிகளும், பேராக்கின் தஞ்சோங் மாலிம் (Tanjung Malim) இல் 154 புள்ளிகளும், சரவாக்கின் செரியான் மாவட்ட போலீஸ் தலைமையகப் (IPD Serian) பகுதியில் 152 புள்ளிகளும் பதிவாகியுள்ளன.

மேலும், ஈப்போவின் தாசிக் (Tasek Ipoh) பகுதியில் 147, திரெங்கானு நகரில் 120 மற்றும் ஈப்போவின் பெகோ (Pegoh Ipoh) பகுதியில் 113 என ஆரோக்கியமற்ற அளவுகள் பதிவாகியுள்ளன.

ஒட்டுமொத்தமாக, இன்று காலை 9 மணி நிலவரப்படி நாடு முழுவதும் 35 பகுதிகள் ஆரோக்கியமற்ற பிரிவில் காற்று மாசடைவுக் குறியீட்டைப் பதிவு செய்துள்ளன.