கோலாலம்பூர், செப். 16: கோலாலம்பூர் அனைத்துலக விமான நிலையத்தில் (KLIA) மின்-வாடகை வாகனங்கள் (e-hailing) நுழைய இன்று முதல் வரியுடன் சேர்த்து RM2 மட்டுமே கட்டணம் வசூலிக்கப்படும்.
இது முனையம் 1 மற்றும் முனையம் 2 ஆகிய இரண்டிற்கும் பொருந்தும்.
புதிய கட்டணம் முனையம் 1-ல் இதுவரை வசூலிக்கப்பட்ட RM3-ஐயும், முனையம் 2-ல் வசூலிக்கப்பட்ட RM2.16-ஐயும் காட்டிலும் குறைவானது என Malaysia Airports Holdings Bhd (MAHB) தெரிவித்துள்ளது.
KLIA முனையம் 1-ல் பயணிகள் ஏற்றும் வசதிகளை மேம்படுத்தும் நடவடிக்கையின் ஒரு பகுதியாக கடந்த ஆகஸ்ட் மாதம் அறிமுகப்படுத்தப்பட்ட மின்-வாடகை வசதிகள் செயல்பாட்டுத் திறனில் குறிப்பிடத்தக்க முன்னேற்றத்தைப் பதிவு செய்துள்ளதாக MAHB தெரிவித்தது.
ஒரு மாதத்திலேயே, ஒதுக்கப்பட்ட 10 நிமிட சலுகை நேரத்துக்குள் பயணிகளை ஏற்றி வெளியேறும் மின்-வாடகை ஓட்டுநர்களின் விகிதம் 49.4 விழுக்காட்டிலிருந்து 99.3 விழுக்காடாக உயர்ந்துள்ளதாக அது குறிப்பிட்டது.
அதேவேளை, பயணிகளை ஏற்றும் பாதைகளுக்குள் தினசரி நுழையும் வாகனங்களின் எண்ணிக்கையும் 8,124-லிருந்து 7,024 ஆக, 13.5 விழுக்காடு குறைந்துள்ளது.
இதன் மூலம் பயணிகள் அதிகமாக வரும் நேரங்களில் வாகனங்கள் விரைவாக வெளியேறுவதுடன், பயணிகளை ஏற்றும் நடவடிக்கைகளும் மேலும் சீராக நடைபெறுகின்றன
மேம்படுத்தப்பட்ட மின்-வாடகை அமைப்பின் மூலம் வாகனங்களின் நுழைவு மற்றும் செயல்பாடுகளை மேலும் கடுமையாகக் கண்காணித்து கட்டுப்படுத்தவும் முடியும்.
