போகோதா ( Bogota),கொலம்பியா — கொலம்பியாவின் மேற்குப் பகுதியில் திங்கட்கிழமை ஏற்பட்ட 7.4 ரிக்டர் அளவிலான சக்திவாய்ந்த நிலநடுக்கத்தில் குறைந்தது 111 பேர் உயிரிழந்தனர்.
நூற்றுக்கணக்கான கட்டிடங்கள் சேதமடைந்தன. இடிபாடுகளுக்குள் பலர் சிக்கியுள்ளனர்.
மீட்புப் பணியாளர்களும் உறவினர்களும் அவர்களைத் தேடி வருகின்றனர்.
நிலநடுக்கத்தில் குறைந்தது 87 பேர் காயமடைந்துள்ளதாகக் கூறிய கொலம்பிய அதிபர் அபெலார்டோ டி லா எஸ்பிரில்லா, மீட்புப் பணிகளுக்கான நிதியை விரைந்து வழங்குவதற்காக அவசரநிலையைப் பிரகடனம் செய்தார்.
"மக்களை நாங்கள் தனியாக விட்டுவிட மாட்டோம். அவர்கள் எங்கள் இதயங்களில் இருக்கிறார்கள். முழு உறுதியோடு அவர்களுக்குத் தேவையான உதவிகளைச் செய்வோம்" என்று அவர் கூறினார்.
இந்த நிலநடுக்கம், போகோதாவிலிருந்து மேற்கே சுமார் 400 கிலோமீட்டர் தொலைவில் உள்ள சோகோ (Choco) வட்டாரத்தில், சுமார் 4,800 மக்கள் வாழும் சான் ஜோஸ் டெல் பால்மர் (San Jose Del Palmar) என்ற பகுதியில் மையமிட்டிருந்ததாக அமெரிக்க புவியியல் ஆய்வு மையம் தெரிவித்தது.
இந்த நிலநடுக்கம் அண்டை நாடுகளான ஈக்வடார் மற்றும் பனாமாவிலும் உணரப்பட்டது. எனினும் அங்கு குறைந்தபட்ச சேதமே ஏற்பட்டுள்ளது.
இதனிடையே, இந்த நிலநடுக்கம் நாட்டின் மேற்குப் பகுதியில் உள்ள பெரைரா, கிப்டோ, கலி மற்றும் மனிசாலேஸ் உள்ளிட்ட நகரங்களைப் பேரழிவிற்கு உள்ளாக்கியுள்ளது.
நிலநடுக்கத்திற்குப் பிந்தைய அதிர்வுகள் ஏற்படக்கூடும் என்ற அதிகாரிகளின் எச்சரிக்கைக்கு மத்தியில், குடியிருப்பாளர்களும் மீட்புக் குழுவினரும் இடிந்து விழுந்த கட்டிடங்களின் இடிபாடுகளை அகற்றி பாதிக்கப்பட்டவர்களைத் தேடி வருகின்றனர்.
நாடு முழுவதும் 20-க்கும் மேற்பட்ட நகராட்சிகள் பாதிக்கப்பட்டுள்ளதாக கொலம்பியாவின் உள்துறை அமைச்சர் தெரிவித்துள்ளார்.
இவ்வேளையில், கொலம்பியாவை நிலைகுலைய வைத்த இந்த இயற்கைப் பேரிடரைத் தொடர்ந்து, மெக்சிகோ, பிரேசில், ஈக்வடார், எல் சால்வடார் மற்றும் அமெரிக்கா உள்ளிட்ட அமெரிக்கக் கண்டங்களின் தலைவர்களிடமிருந்து ஆதரவுகள் குவிந்த வண்ணம் உள்ளன.
"கொலம்பியாவில் ஏற்பட்ட சக்திவாய்ந்த நிலநடுக்கத்தை டிரம்ப் நிர்வாகம் உன்னிப்பாகக் கவனித்து வருகிறது. கொலம்பியா மக்களுக்கு ஆதரவளிக்கத் தயாராக உள்ளது," என்று அமெரிக்க வெளியுறவுத்துறை அமைச்சர் மார்கோ ரூபியோ எக்ஸ் (X) தளத்தில் பதிவிட்டுள்ளார்.
பல்வேறு நாடுகள் தங்களது உதவிகளை வழங்க முன்வந்துள்ள நிலையில் ஐநாவின் துணை செய்தித் தொடர்பாளர் ஃபர்ஹான் ஹக், "தேவைக்கேற்ப உதவ நாங்கள் தயாராக இருக்கிறோம்" என்று தெரிவித்துள்ளார்.
மத்திய மற்றும் மேற்கு கொலம்பியாவில் சிறிய அளவிலான நிலநடுக்கங்கள் ஏற்படுவது சாதாரணமான ஒன்றாகும், ஆனால் 6.0 ரிக்டர் அளவுக்கு மேல் நிலநடுக்கம் ஏற்படுவது மிகவும் அரிதானது.
கடந்த 1999-ஆம் ஆண்டு, அர்மீனியா நகருக்கு அருகே ஏற்பட்ட 6.2 ரிக்டர் அளவிலான நிலநடுக்கம் 1,100-க்கும் மேற்பட்டோரின் உயிரைப் பறித்தது குறிப்பிடத்தக்கது.
