செபாங், : செபாங்கில் நடைபெறவுள்ள ஒருமுறை மட்டுமேயான ஃபார்முலா 1 கார் பந்தயத்தின் டிக்கெட் விலையை பஹ்ரைன் அரசே தீர்மானிக்கும்.
மேலும் டிக்கெட் விற்பனை வருவாயையும் பஹ்ரைன் நாடே எடுத்துக் கொள்ளுமென செபாங் அனைத்துலக கார் பந்தயத் தளத்தின்(SIC) தலைமை நிர்வாக அதிகாரி அஸ்ஹான் ஷாஃப்ரிமான் ஹனிஃப் தெரிவித்தார்.
மலேசியர்களுக்கு மலிவான விலையில் டிக்கெட்டுகள் கிடைப்பதை உறுதி செய்வதற்காக பஹ்ரைனுடன் SIC இன்னும் பேச்சுவார்த்தை நடத்தி வருவதாக அவர் கூறினார்.
ஆனால் இறுதி முடிவு பஹ்ரைனிடமே உள்ளது என செபாங்கில் செவ்வாய்க்கிழமை (ஜூலை 28) நடைபெற்ற செய்தியாளர் சந்திப்பில் அஸ்ஹான் கூறினார்.
"மலேசியர்களுக்கு ஒரு சிறப்பு விலை, ஒருவேளை மைக்காட் (MyKad) வைத்திருப்பவர்களுக்கான விலையைப் பெற நான் எனது சிறந்த முயற்சியை மேற்கொள்வேன், ஆனால் இறுதி முடிவு பஹ்ரைனிடமே உள்ளது, ஏனெனில் போட்டியை நடத்துவதற்கான உரிமைக்கான கட்டணத்தை அவர்களே செலுத்துகிறார்கள்," என்று அவர் மேலும் கூறினார்.
மலேசியா இதற்கு முன்பு ஃபார்முலா 1 போட்டிகளை நடத்திய காலத்தை விட இந்த முறை பந்தயம் கணிசமாக அதிக பொருளாதார பலன்களைத் தரும் என்று அஸ்ஹான் எதிர்பார்க்கிறார்.
"கடந்த காலத்தில், நாங்கள் டிக்கெட்டுகளை விற்க கடுமையாக உழைக்க வேண்டியிருந்தது. இன்று, ஃபார்முலா 1 ஒரு பெரிய உலகளாவிய ரசிகர் பட்டாளத்தை உருவாக்கியுள்ளது மற்றும் போட்டியைத் தவறவிட்டு விடுவோமோ என்ற ஏக்கத்தையும் ஏற்படுத்தியுள்ளது," என்று அவர் கூறினார்.
"அறிவிப்பு வெளியானதிலிருந்து, விளம்பரதாரர்கள், விழாக்கள் மற்றும் வணிக நடவடிக்கைகள் குறித்த கேள்விகள் எங்களுக்கு வந்துள்ளன. இது ஒரு மகிழ்ச்சியான சுமை," என்று அவர் மேலும் கூறினார்.
இன்றைய ஃபார்முலா 1 கார் பந்தயத்தின் பிரபலம் மலேசியாவிற்கு வலுவான சுற்றுலா, வணிக வாய்ப்புகள் மற்றும் பொருளாதார வளர்ச்சியைத் தரும் என்று அவர் கூறினார்.
இருப்பினும், மலேசியாவிற்கு ஃபார்முலா 1 நீண்ட காலத்திற்குத் திரும்புவதைக் கருத்தில் கொள்வதற்கு முன், இந்த ஒருமுறை மட்டுமே நடக்கும் நிகழ்வை வெற்றிகரமாக நடத்துவதில் மட்டுமே SIC கவனம் செலுத்துகிறது என்று அஸ்ஹான் வலியுறுத்தினார்.
