ஷா ஆலாம், ஜூலை 9 - செயற்கை நுண்ணறிவு (AI) தொழில்நுட்பத்தின் மீதான அதீத சார்புநிலை, மனிதர்களின் சுதந்திரமாகச் சிந்திக்கும் திறனைப் பாதித்துவிடக் கூடாது என நுகர்வோர் உளவியல் நிபுணரும் எழுத்தாளருமான நதீம் சாடிக் எச்சரித்துள்ளார்.
AI தொழில்நுட்பம் என்பது மனிதர்களின் படைப்பாற்றலை அதிகரிக்கவும், அறிவை விரிவுபடுத்தவும், தகவல்களை விரைவாகப் பெறவும் உதவும் ஒரு சிறந்த கருவியாகும்.
எனவே, அதனை ஒரு நல்ல நண்பனாக ஏற்றுக்கொள்ள வேண்டுமே தவிர, அதன் மீது குருட்டு நம்பிக்கை வைக்கக் கூடாது என்று அவர் குறிப்பிட்டுள்ளார்.
AI தொழில்நுட்பத்தை எவ்வளவு வேண்டுமானாலும் பயன்படுத்தலாம். ஆனால், அதனை ஒரு உரையாடல் வடிவில், ஊடாடும் முறையில் (Interactive) பயன்படுத்த வேண்டும். பழைய கூகுள் (Google) தேடுபொறியைப் போல வெறும் கேள்விகளைக் கேட்டு பதில்களை மட்டும் பெற்றுக் கொண்டிருந்தால், அது மூளையின் சிந்திக்கும் திறனை பலவீனப்படுத்திவிடும்.
AI வழங்கும் மிக சரளமான மற்றும் நம்பகமான பதில்களால், பயனர்கள் தங்களின் சிந்திக்கும் ஆற்றலை முழுமையாகத் தொழில்நுட்பத்திடம் ஒப்படைத்துவிட்டுச் செயலற்றவர்களாக மாறும் இந்த நிலையை ஆய்வாளர்கள் 'அறிவாற்றல் சரணடைதல்' (Cognitive surrender) என்று அழைக்கிறார்கள்.
இதுமட்டுமின்றி, AI அடிப்படையிலான போர்கள், பொருளாதார சமத்துவமின்மை, போலிச் செய்திகள் பரவுதல், தரவு மேலாதிக்கத்தில் மேற்கத்திய நாடுகளின் ஆதிக்கம் போன்ற பல்வேறு உலகளாவிய சவால்கள் குறித்தும் அவர் தனது கவலையை வெளிப்படுத்தினார்.
அதேவேளையில், பதிப்பகத் துறையில் பாரம்பரிய சந்தைப்படுத்தல் முறைகளுக்குப் பதிலாக, ஒவ்வொரு புத்தகத்திற்கும் ஏற்றவாறு வாசகர்களைக் கவரும் தனிப்பயனாக்கப்பட்ட உத்திகளை உருவாக்க AI பெரிதும் உதவுகிறது. "AI என்பது மனிதனின் படைப்பாற்றலை மாற்றுவதற்குக் கொண்டு வரப்பட்டது அல்ல, மாறாக அதற்கு ஆதரவளிப்பதற்காகவே உருவாக்கப்பட்டது.
மேலும், மனிதர்களின் உணர்வுகளை AI தொழில்நுட்பத்தால் ஒருபோதும் ஈடு செய்ய முடியாது.
எனவே, தொழில்நுட்பத்தை அப்படியே நம்பவோ அல்லது முழுமையாக நிராகரிக்கவோ செய்யாமல், அதனுடன் ஒரு பகுத்தறிவு மற்றும் சமநிலையான உறவை மக்கள் வளர்த்துக் கொள்ள வேண்டும்," என்று வலியுறுத்தினார்.
