ஷா ஆலாம், ஜூலை 1: டிஜிட்டல் அறிவை மேம்படுத்துவதை நோக்கமாகக் கொண்ட 'இணையப் பாதுகாப்பு பிரச்சாரம்' (Safe Internet Campaign), கடந்த மே மாதம் வரையில் சிலாங்கூர் மாநிலம் முழுவதிலும் உள்ள 900க்கும் மேற்பட்ட பள்ளிகளில் வெற்றிகரமாகச் செயல்படுத்தப்பட்டுள்ளது.
இத்திட்டத்தின் வழி இதுவரை ஏறத்தாழ 53,000 மாணவர்கள் மற்றும் ஆசிரியர்கள் பயனடைந்துள்ளனர். இணையப் பாதுகாப்பு குறித்த விழிப்புணர்வை ஏற்படுத்துவதற்காக, இந்த பிரச்சாரம் கல்வி நிலைகளுக்கு ஏற்ப பிரத்தியேகமாக வடிவமைக்கப்பட்டுள்ளதாக சிலாங்கூர் மாநில மலேசிய தகவல் தொடர்பு மற்றும் பல்லூடக ஆணையத்தின் (MCMC) இயக்குநர் அமல் அப்துல் அஜிஸ் தெரிவித்துள்ளார்.
இதன் கீழ், ஆரம்பப் பள்ளி மாணவர்களுக்குச் சமூக ஊடகங்கள் அறிமுகப்படுத்தப்பட்டு, அவர்களின் வயதுக்கு ஏற்ற தளங்களை அடையாளம் காண்பது மற்றும் டிஜிட்டல் சூழலில் உள்ள ஆபத்துகள் குறித்து விளக்கமளிக்கப்படுகிறது.
அதே வேளையில், இடைநிலைப்பள்ளி மாணவர்களுக்கு இணையத்தைக் கற்றல் கருவியாகவும், பாதுகாப்பாகவும், பொறுப்புணர்வுடனும் எவ்வாறு பயன்படுத்துவது என்பது கற்றுக் கொடுக்கப்படுவதாக அவர் கூறினார்.
மேலும், எதிர்வரும் மாதங்களில் 'பாதுகாப்பான இணைய சமூகம்' கார்னிவல்களை (Safe Internet Community Carnivals) ஏற்பாடு செய்வதன் மூலம், இந்த இயக்கத்தைச் சிலாங்கூர் மாநிலம் முழுவதும் எம்சிஎம்சி (MCMC) விரிவுபடுத்தும் என அவர் குறிப்பிட்டார்.
இந்தத் திட்டம், இணையவழி மோசடிகள், சமீபத்திய இணையக் குற்றப் போக்குகள் மற்றும் தடுப்பு நடவடிக்கைகள் குறித்த விழிப்புணர்வை ஏற்படுத்துவதோடு, பெற்றோர்கள் மற்றும் மூத்த குடிமக்கள் உள்ளிட்ட ஒட்டுமொத்த சமூகத்தையும் ஈடுபடுத்துவதற்காகப் பல்வேறு முகமைகளுடனான கூட்டுறவை உள்ளடக்கியுள்ளது.
