கோலாலம்பூர், ஜூன் 18 - மலேசியாவின் புகழ்பெற்ற உயர்கல்வி நிறுவனமான மலாயா பல்கலைக்கழகம் (UM), சர்வதேச அளவிலான கியூஎஸ் உலகப் பல்கலைக்கழகத் தரவரிசையில் (QS World University Rankings) தனது வரலாற்றிலேயே மிக உயர்ந்த இடத்தை அடைந்து புதிய சாதனை படைத்துள்ளது.
முன்னதாக 58-ஆவது இடத்தில் இருந்த இப்பல்கலைக்கழகம், தற்போது இரண்டு இடங்கள் முன்னேறி 56-ஆவது இடத்தைக் கைப்பற்றியுள்ளது. இந்த அரிய சாதனை மலேசியாவின் முதன்மைப் பல்கலைக்கழகம் என்ற அதன் அந்தஸ்தை மேலும் வலுப்படுத்தியதோடு, உலகளாவிய கல்வி நிறுவனங்களில் சிறந்த 3.7 விழுக்காட்டுப் பட்டியலிலும் அதனை இடம்பெறச் செய்துள்ளது.
மலேசியப் பல்கலைக்கழகங்களுக்கு இடையிலான ஒப்பீட்டில், கல்விசார் நன்மதிப்பு (Academic Reputation), முதலாளிகளின் நன்மதிப்பு (Employer Reputation), வேலைவாய்ப்பு முடிவுகள் (Employment Outcomes) மற்றும் நிலைத்தன்மை (Sustainability) ஆகிய முக்கியக் குறியீடுகளில் மலாயா பல்கலைக்கழகம் முதலிடத்தைப் பிடித்து அசத்தியுள்ளது.
உலகளாவிய ரீதியில் இக்குறியீடுகளில் முறையே 56, 61, 184 மற்றும் 166 ஆகிய சிறப்பான இடங்களை மலாயா பல்கலைக்கழகம் பெற்றுள்ளது. அதுமட்டுமின்றி, சர்வதேச ஆராய்ச்சி வலையமைப்பில் 125-ஆவது இடத்தையும், சர்வதேச மாணவர் சேர்க்கையில் 153-ஆவது இடத்தையும் பிடித்து உலக அரங்கில் தனது ஆதிக்கத்தை நிலைநிறுத்தியுள்ளது.
இந்த மகத்தான வெற்றி குறித்துப் பேசிய மலாயா பல்கலைக்கழகத்தின் துணைவேந்தர் டத்தோ ஸ்ரீ பேராசிரியர் டாக்டர் நூர் அசுவான் அபு ஒஸ்மான், இச்சாதனை பல்கலைக்கழகத்திற்கும் நாட்டிற்கும் பெருமை சேர்க்கும் ஒரு வரலாற்று முக்கியத்துவம் வாய்ந்த தருணம் என்று வர்ணித்துள்ளார்.
மேலும், கல்வித்துறையினர், ஆராய்ச்சியாளர்கள், மாணவர்கள், பணியாளர்கள் மற்றும் தலைமைத்துவக் குழுவினரின் ஒருங்கிணைந்த கூட்டு உழைப்பிற்குச் சான்றாக இந்த வெற்றி அமைந்துள்ளதாக அவர் கூறினார். முறையான உத்திகள், தெளிவான தொலைநோக்குப் பார்வை, துணிச்சல் மற்றும் தொடர் செயல்பாடுகள் இணையும் போது, மலாயா பல்கலைக்கழகம் உலகளாவிய உயர்கல்வித் துறையில் வெறும் பங்காளியாக மட்டும் இருக்காது, மாறாக அத்துறையின் திசையைத் தீர்மானிக்கும் சக்தியாக விளங்கும் என்பதை இது உறுதிப்படுத்துகிறது என்றும் அவர் சுட்டிக்காட்டினார்.
டிஜிட்டல் உருமாற்றம், நிலைத்தன்மை, திறமைமிக்கவர்களை உருவாக்குதல், புதிய கண்டுபிடிப்புகள் மற்றும் உலகளாவிய முயற்சிகள் ஆகியவற்றில் பல்கலைக்கழகம் செலுத்திய தீவிரக் கவனமே இதற்குக் காரணம் என்றும் அவர் கூறினார்.
உலகளவில் மொத்தம் 8,808 கல்வி நிறுவனங்கள் மதிப்பிடப்பட்டதில், மலேசியாவின் 32 பல்கலைக்கழகங்கள் உட்பட 1,504 நிறுவனங்கள் மட்டுமே அதிகாரப்பூர்வப் பட்டியலில் வெளியிடப்பட்டன என்பது குறிப்பிடத்தக்கது.
2026-ஆம் ஆண்டில் தனது 121-ஆவது ஆண்டு நிறைவைக் கொண்டாடும் மலாயா பல்கலைக்கழகம், தேசத்திற்கும் உலகிற்கும் எண்ணற்ற தலைவர்களையும் அறிஞர்களையும் உருவாக்கியுள்ளது என்பது இங்கு நினைவுகூரத்தக்கது.
