கூலாய், ஜூன் 16 – கூலாய், ஜேபி சென்ட்ரல் (JB Sentral) மற்றும் பாசிர் கூடாங் ஆகிய பகுதிகளை இணைக்கும் புதிய ‘ஷட்டில் செலாத்தான்’ (Shuttle Selatan) ரயில் சேவை இன்று அதிகாரப்பூர்வமாகத் தொடங்கப்பட்டுள்ளது. இத்திட்டம் இப்பகுதிகளில் உள்ள இரண்டு மில்லியனுக்கும் அதிகமான மக்களுக்குப் பெரும் பயனளிக்கும் என எதிர்பார்க்கப்படுகிறது.
இன்று கூலாய் கேடிஎம் (KTM) ரயில் நிலையத்தில் நடைபெற்ற ரயில் சேவையின் தொடக்க விழாவில் கலந்துகொண்டு பேசிய போக்குவரத்து அமைச்சர் அந்தோணி லோக், முதற்கட்டமாக இந்த ரயில் சேவையானது இரண்டு முக்கிய வழித்தடங்களில் இயங்கும் என்றார். அவை கூலாய் - ஜேபி சென்ட்ரல் - கூலாய் மற்றும் கெம்பாஸ் பாரு - பாசிர் கூடாங் - கெம்பாஸ் பாரு ஆகிய வழித்தடங்களாகும்.
எதிர்காலத்தில் இந்தச் சேவையை மேலும் விரிவுபடுத்த அரசு திட்டமிட்டுள்ளதாகக் குறிப்பிட்ட அவர், கூலாய் வழித்தடத்தைக் குளுவாங், ரெங்கம் மற்றும் லாயாங்-லாயாங் நிலையங்கள் வழியாகப் பாலோ (Paloh) வரை நீட்டிக்கத் திட்டமிடப்பட்டுள்ளது என்றார்.
"மேலும் அதிகமான மக்கள் இந்த ரயில் போக்குவரத்துச் சேவையின் பலன்களைப் பெறுவதை உறுதி செய்வதற்காக, தாமான் டாயா, பண்டார் பாரு ஸ்ரீ ஆலாம் மற்றும் பாசிர் புத்தே ஆகிய இடங்களில் மூன்று புதிய ரயில் நிலையங்களைத் திறக்கவும் திட்டமிடப்பட்டுள்ளது," என்று அவர் விவரித்தார்.
இந்நிகழ்வில் ஜோகூர் மந்திரி பெசார் டத்தோ ஆன் ஹஃபிஸ் காசி மற்றும் மாநிலப் பொதுப்பணி, போக்குவரத்து, உள்கட்டமைப்பு மற்றும் தகவல் தொடர்பு குழுவின் தலைவர் முகமட் ஃபஸ்லி முகமட் சாலே ஆகியோரும் கலந்து கொண்டனர்.
இந்தப் புதிய சேவை பயணிகளுக்கு மிக வேகமான மற்றும் வசதியான பயணத்தை வழங்கும். கூலாயில் இருந்து ஜேபி சென்ட்ரலுக்குச் செல்ல சுமார் 40 நிமிடங்களும், கெம்பாஸ் பாருவிலிருந்து பாசிர் கூடாங்கிற்குச் செல்ல 40 முதல் 45 நிமிடங்களும் மட்டுமே பிடிக்கும் என்பது குறிப்பிடத்தக்கது.
பயணிகளின் முதல் மற்றும் இறுதி மைல் (First mile and last mile) பயணத்தை மேலும் எளிதாக்குவதற்காக, இணைப்புப் பேருந்துகள் (Feeder Bus), 'பஸ்.மை' (Bas.My) பேருந்து வழித்தடங்களின் ஒருங்கிணைப்பு, கெம்பாஸ் பாருவில் சிறப்பு ஷட்டில் சேவை மற்றும் பண்டார் டத்தோ ஓன் ஏயோன் (AEON) வணிக வளாகத்தில் 'பார்க் அண்ட் ரைடு' (Park and Ride) வாகன நிறுத்துமிட வசதி போன்ற திட்டங்களையும் அரசாங்கம் செயல்படுத்தியுள்ளது என்று அமைச்சர் கூறினார்.
பொதுப் போக்குவரத்தைப் பயன்படுத்துவதை ஊக்குவிப்பதற்காக, அரசாங்கம் 'கார்ட் கொமுட்டர் மடாணி ஷட்டில் செலாத்தான்' (Kad Komuter MADANI Shuttle Selatan) எனும் பயண அட்டையை அறிமுகப்படுத்தியுள்ளது.
இதன் கீழ் ஜோகூர் மக்களுக்கு 3,000 பயண அட்டைகள் இலவசமாக விநியோகிக்கப்படவுள்ளன. 50 ரிங்கிட் மதிப்புள்ள இந்த அட்டையைக் கொண்டு, பயனர்கள் நிர்ணயிக்கப்பட்ட காலத்திற்குள் இந்த ஷட்டில் செலாத்தான் சேவையை எவ்வித வரம்புமின்றி பயன்படுத்திக் கொள்ளலாம்.
"இந்த முயற்சியின் மூலம், மக்கள் பொதுப் போக்குவரத்திற்கு மாறுவதை ஊக்குவிப்பதற்காக, ரயில்வே கழகம் (RAC) 150,000 ரிங்கிட்டிற்கும் அதிகமான நிதியை ஒதுக்கியுள்ளது," என்றும் அவர் கூறினார்.
தொழில்துறை, தளவாடங்கள், துறைமுகங்கள், கல்வி மற்றும் வணிகத் துறைகளின் அதிவேக வளர்ச்சிக்கு ஏற்ப, நாட்டின் மிக வேகமாக வளர்ந்து வரும் மாநிலங்களில் ஒன்றான ஜோகூருக்குத் திறமையான மற்றும் நம்பகமான பொதுப் போக்குவரத்து அமைப்பு மிகவும் அவசியமாகும்.
குடியிருப்புப் பகுதிகள், நகர மையங்கள் மற்றும் முக்கிய தொழில்துறை மண்டலங்களுக்கு இடையிலான தொடர்பை வலுப்படுத்துவதற்காகவே இந்த 'ஷட்டில் செலாத்தான்' அறிமுகப்படுத்தப்பட்டுள்ளது என்று அமைச்சர் அந்தோணி லோக் மேலும் கூறினார்.
இந்தத் திட்டம் போக்குவரத்து அமைச்சு, மலாயா ரயில்வே நிறுவனம் (KTMB) மற்றும் ரயில்வே சொத்து கழகம் (RAC) ஆகியவற்றின் நெருக்கமான ஒத்துழைப்பின் மூலம் சாத்தியமாகியுள்ளது.
