புத்ராஜெயா, ஜூன் 13: கடந்த திங்கட்கிழமை (ஜூன் 8, 2026) தெற்கு மின்டானாவோவில் உள்ள சரங்கானி கடலோரப் பகுதியில் ஏற்பட்ட சக்திவாய்ந்த நிலநடுக்கத்தைத் தொடர்ந்து, பிலிப்பைன்ஸ் அரசாங்கத்திற்கும் அந்நாட்டு மக்களுக்கும் மலேசியா தனது ஆழ்ந்த இரங்கலையும் அனுதாபத்தையும் தெரிவித்துக் கொண்டுள்ளது.
இந்த இயற்கை பேரிடரினால் ஏற்பட்ட உயிர் இழப்புகள், காயமடைந்தவர்கள் மற்றும் வீடுகளை இழந்து தவிக்கும் மக்களின் நிலை குறித்து மலேசியா மிகுந்த கவலையும் வேதனையும் அடைந்துள்ளதாக மலேசிய வெளியுறவு அமைச்சு இன்று சனிக்கிழமை வெளியிட்ட அறிக்கையில் தெரிவித்துள்ளது.
இந்த இக்கட்டான மற்றும் துயரமான சூழ்நிலையைக் கடந்து வரும் பிலிப்பைன்ஸ் நாட்டு மக்களுடன் மலேசிய அரசாங்கமும் அதன் பொதுமக்களும் என்றும் உறுதுணையாக இருப்பார்கள் என்று அந்த அறிக்கையில் குறிப்பிடப்பட்டுள்ளது.
மேலும், நிலநடுக்கத்தால் பாதிக்கப்பட்ட பகுதிகளில் தற்போது மேற்கொள்ளப்பட்டு வரும் அவசரகால மீட்பு மற்றும் மறுசீரமைப்புப் பணிகளுக்குத் தேவையான உதவிகளை வழங்குவதற்கு மலேசியா தயாராக இருப்பதாகவும், பிலிப்பைன்ஸ் அரசாங்கம் விரும்பும் பட்சத்தில் உரிய உதவிகள் உடனடியாக வழங்கப்படும் என்றும் விஸ்மா புத்ரா தெரிவித்துள்ளது.
இதற்கிடையில், ஜெனரல் சாண்டோஸ் சிட்டி (General Santos City) மற்றும் அதன் சுற்றுவட்டாரப் பகுதிகளில் வசிக்கும் மலேசியர்கள் உட்பட, நிலநடுக்கத்தால் பாதிக்கப்பட்ட பகுதிகளில் உள்ள மலேசிய குடிமக்களுக்குத் தேவையான உதவிகளை உடனுக்குடன் வழங்கிய பிலிப்பைன்ஸ் அதிகாரிகளுக்கு மலேசிய அரசு தனது மனமார்ந்த நன்றியைத் தெரிவித்துக் கொண்டது.
