கோலாலம்பூர், ஜூன் 12: மாறிவரும் தீவிர வானிலை மற்றும் எல் நினோ (El Nino) தாக்கங்களை எதிர்கொள்வதற்கு, அடிமட்ட அளவில் மக்கள் மத்தியில் போதிய விழிப்புணர்வும் தயார்நிலையும் வலுப்படுத்தப்பட வேண்டும் என்று பிரதமர் டத்தோ ஸ்ரீ அன்வார் இப்ராஹிம் தெரிவித்துள்ளார்.
முன்னெச்சரிக்கை நடவடிக்கைகளும் ஆரம்பகட்ட ஆயத்தங்களுமே இதுபோன்ற கடுமையான இயற்கைச் சவால்களைச் சமாளிப்பதற்கான சிறந்த அரணாக விளங்கும் என்றும் அவர் குறிப்பிட்டுள்ளார்.
மலேசிய வானிலை ஆய்வு மையம் (MetMalaysia) எல் நினோ நாட்டிற்கு ஏற்படுத்தக்கூடிய தாக்கங்கள் குறித்து சமர்ப்பித்த விரிவான அறிக்கையைத் தேசிய பொருளாதார மன்றம் (MTEN) கூர்ந்து ஆராய்ந்தது.
இந்த விவாதத்திற்குப் பிறகு, எல் நினோ குறித்த விளக்கங்களையும் விழிப்புணர்வுத் தகவல்களையும் பொதுமக்களுக்கு விரிவாகக் கொண்டு சேர்க்கும் வகையில், வானிலை ஆய்வு மையம் உடனடியாக அனைத்து மாநிலங்களுக்கும் நேரடியாகச் சென்று தகுந்த விளக்கக் கூட்டங்களை நடத்த வேண்டும் என இக்கூட்டத்தில் ஒப்புக்கொள்ளப்பட்டதாகப் பிரதமர் தமது முகநூல் பதிவில் தெரிவித்துள்ளார்.
அத்துடன், மலேசிய பெட்ரோலிய வளக் கழகம் (MPRC) நாட்டின் எண்ணெய் மற்றும் எரிவாயு சேவை மற்றும் உபகரண நிறுவனங்களின் எதிர்காலத் திசைநோக்கு குறித்து சமர்ப்பித்த அறிக்கையையும் இந்த கூட்டத்தில் மன்றம் பரிசீலித்தது.
இது குறித்துப் பிரதமர் கருத்துரைக்கையில், வணிக நடவடிக்கைகள் மற்றும் தொழில்துறை விரிவாக்கம் ஆகியவை அந்தந்த துறை சார்ந்த நிபுணர்களின் திறன், வேகம் மற்றும் சாதுரியத்தின் மூலமே இயக்கப்பட வேண்டும் என்றும், அரசாங்கம் அதற்கான தெளிவான மற்றும் சாதகமான கொள்கைகளை மட்டுமே தொடர்ந்து வழங்கும் என்றும் தெளிவுபடுத்தினார்.
உலகளாவிய பொருளாதார நிச்சயமற்ற தன்மை, புவிசார் அரசியல் பதற்றங்கள் மற்றும் சவாலான உலகளாவிய நெருக்கடிகளுக்கு மத்தியில் மலேசிய மடாணி (MADANI) அரசாங்கம் எப்போதும் தொலைநோக்குப் பார்வையுடனும் விவேகத்துடனும் செயல்படும் என்றும் பிரதமர் உறுதியளித்தார்.
நாட்டின் பொருளாதாரம் தொடர்ந்து நிலையானதாகவும், மீள்தன்மை கொண்டதாகவும், எதிர்காலச் சவால்களை எதிர்கொள்ளும் அளவுக்கு வலுவானதாகவும் இருப்பதை உறுதி செய்வதற்கும், மக்களின் நலன்களைப் பாதுகாப்பதற்கும் இந்த நடவடிக்கைகள் மிக அவசியம் என்றும் அவர் மேலும் கூறினார்.
