ஷா ஆலம், ஜூன் 9: இன்று மாலை 6.00 மணி வரை சிலாங்கூர் உட்பட நாட்டின் பல மாநிலங்களில் இடியுடன் கூடிய கனமழை பெய்வதற்கான வாய்ப்புகள் இருப்பதாக மலேசிய வானிலை ஆய்வு மையம் (மெட்மலேசியா) எச்சரிக்கை விடுத்துள்ளது.
சிலாங்கூர் மாநிலத்தில் கோலா சிலாங்கூர், உலு சிலாங்கூர், கோலா லங்காட், உலு லங்காட் மற்றும் சிப்பாங் ஆகிய மாவட்டங்களோடு சேர்த்து புத்ராஜெயா கூட்டரசு பிரதேசமும் இந்த மோசமான வானிலை எச்சரிக்கைக்கு உட்பட்ட பகுதிகளாக அடையாளம் காணப்பட்டுள்ளன.
இதேபோன்ற வானிலை எச்சரிக்கை தீபகற்ப மலேசியாவின் இதர மாநிலங்களான கெடா, பினாங்கு, பேராக், திராங்கானு, பகாங், நெகிரி செம்பிலான் மற்றும் ஜோகூர் ஆகியவற்றின் ஒரு சில பகுதிகளுக்கும் விடுக்கப்பட்டுள்ளது.
மேலும், கிழக்கு மலேசியாவில் சரவாக் மாநிலத்தின் மிரி பகுதியிலும், சபா மாநிலத்தில் மேற்கு கடற்கரை, சண்டாக்கான் மற்றும் கூடாட் ஆகிய இடங்களிலும் இந்த மோசமான வானிலை நீடிக்கும் என்று கணிக்கப்பட்டுள்ளது.
மணிக்கு 20 மில்லி மீட்டருக்கும் அதிகமான தீவிரத்துடன் மழை பெய்யும் அறிகுறிகள் தென்படும் போதும் அல்லது அத்தகைய கனமழை ஒரு மணி நேரத்திற்கும் மேலாக நீடிக்கும் என்று எதிர்பார்க்கப்படும் போதும் இந்த இடியுடன் கூடிய மழைக்கான எச்சரிக்கை விடுக்கப்படுவதாக வானிலை ஆய்வு மையம் விளக்கியுள்ளது.
இந்த எச்சரிக்கையானது ஒவ்வொரு முறை வெளியிடப்படும் போதும் அதிகபட்சமாக ஆறு மணி நேரத்திற்கு மட்டுமே செல்லுபடியாகும் ஒரு குறுகிய கால எச்சரிக்கை என்றும் அது குறிப்பிட்டுள்ளது.
எனவே, பொதுமக்கள் அனைவரும் பாதுகாப்புடன் எச்சரிக்கையாக இருக்குமாறும், வானிலை குறித்த தகவல்களை மலேசிய வானிலை ஆய்வு மையத்தின் அதிகாரப்பூர்வ ஊடகத் தளங்களின் வாயிலாக அவ்வப்போது அறிந்து கொள்ளுமாறும் கேட்டுக்கொள்ளப்படுகிறார்கள்.
