தோக்கியோ, மே 20 – ஈரான் உடனான போர் மிக விரைவில் முடிவுக்கு வரும் என்று மீண்டும் ஒருமுறை திட்டவட்டமாகக் அமெரிக்க அதிபர் டொனால்ட் டிரம்ப் கூறியதைத் தொடர்ந்து, உலக சந்தையில் கச்சா எண்ணெய் விலை சற்றே சரிவைக் கண்டுள்ளது.
இருப்பினும், மத்திய கிழக்கு பிராந்தியத்தில் நிலவும் மோதல்களால் எண்ணெய் விநியோகத்தில் ஏற்பட்டுள்ள தொடர் தடைகளுக்கு மத்தியில், அமைதிப் பேச்சுவார்த்தையின் இறுதி முடிவு எவ்வாறு இருக்கும் என்பது குறித்து முதலீட்டாளர்கள் இன்னும் சற்று எச்சரிக்கையுடனேயே இருந்து வருகின்றனர்.
அதன்படி, சர்வதேச சந்தையில் பிரெண்ட் கச்சா எண்ணெய் விலையானது 0.4 விழுக்காடு சரிந்து, ஒரு பேரல் 110.83 அமெரிக்க டாலராகப் பதிவாகியுள்ளது. அதே வேளையில், அமெரிக்காவின் வெஸ்ட் டெக்சாஸ் இன்டர்மீடியட் (WTI) கச்சா எண்ணெய் விலையும் 0.3 விழுக்காடு குறைந்து, ஒரு பேரல் 103.88 அமெரிக்க டாலராக வீழ்ச்சியடைந்துள்ளது.
அமெரிக்காவும் ஈரானும் தங்களின் பேச்சுவார்த்தையில் நல்ல முன்னேற்றம் கண்டுள்ளதாகவும், இரு தரப்புமே மீண்டும் ஒரு ராணுவ மோதலைக் காண விரும்பவில்லை என்றும் அமெரிக்கத் துணை அதிபர் ஜே.டி. வான்ஸ் (JD Vance) தெரிவித்தார். இதனைத் தொடர்ந்து, இவ்விரு முக்கிய கச்சா எண்ணெய் விலைகளும் நேற்று கிட்டத்தட்ட 1 அமெரிக்க டாலர் வரை சரிவைக் கண்டன என்பது குறிப்பிடத்தக்கது.
வாஷிங்டனுக்கும் தெஹ்ரானுக்கும் இடையே உண்மையில் ஒரு பொதுவான உடன்பாடு எட்டப்பட்டு அமைதி ஒப்பந்தம் சாத்தியமாகுமா என்பதை உன்னிப்பாகக் கவனிக்க முதலீட்டாளர்கள் ஆர்வமாக உள்ளனர் என்று புஜிதோமி செக்யூரிட்டீஸ் நிறுவனத்தின் பகுப்பாய்வாளர் டோஷிடாக்கா தஸாவா தெரிவித்துள்ளார்.
அமெரிக்காவின் நிலைப்பாடு நாளுக்கு நாள் மாறி வருவதால், ஈரானின் மீது அமெரிக்கா மீண்டும் தாக்குதல் நடத்துவதற்கான சாத்தியக்கூறுகள் இன்னும் நிலவுகின்றன.
மேலும், ஒருவேளை அமைதி ஒப்பந்தம் எட்டப்பட்டாலும் கூட, கச்சா எண்ணெய் விநியோகம் உடனடியாகப் போருக்கு முந்தைய நிலைக்குத் திரும்பாது என்பதால், எண்ணெய் விலை தொடர்ந்து உச்சத்திலேயே நீடிக்க வாய்ப்புள்ளது என்றும் அவர் சுட்டிக்காட்டியுள்ளார்.
இந்த மோதல் விரைவாக முடிவுக்கு வரும் என்று நேற்று அமெரிக்க நாடாளுமன்ற உறுப்பினர்களிடம் டிரம்ப் உறுதியளித்திருந்த போதிலும், வாஷிங்டன் மீண்டும் ஈரானைத் தாக்க வேண்டிய கட்டாயம் ஏற்படலாம் என்றும், முன்னதாக அத்தகைய தாக்குதலுக்கு உத்தரவிடுவதற்கு ஒரு மணி நேரத்திற்கு முன்பே தாம் அதை ஒத்திவைத்ததாகவும் அவர் குறிப்பிட்டிருந்தார்.
அமெரிக்கா மற்றும் இஸ்ரேல் கூட்டு சேர்ந்து ஈரான் மீது தொடுத்துள்ள போரை முடிவுக்குக் கொண்டுவர தெஹ்ரானிடமிருந்து புதிய திட்டம் முன்வைக்கப்பட்டதை அடுத்து, திட்டமிடப்பட்டிருந்த அடுத்தகட்ட தாக்குதலைத் தாம் தற்காலிகமாக நிறுத்தி வைத்துள்ளதாகக் கூறிய மறுநாளே டிரம்ப் இந்த எச்சரிக்கையை விடுத்துள்ளார்.
மேலும், ஈரானியத் தலைவர்கள் ஒப்பந்தத்திற்காகக் கெஞ்சிக் கொண்டிருப்பதாகக் குறிப்பிட்ட அவர், ஒப்பந்தம் எட்டப்படாவிட்டால் எதிர்வரும் நாட்களில் அமெரிக்காவின் புதிய தாக்குதல் இருக்கும் என்றும் எச்சரித்துள்ளார்.
உலகளாவிய எண்ணெய் விநியோகத்தில் ஐந்தில் ஒரு பங்கைத் தன் வசம் கொண்டுள்ள முக்கியமான 'ஹார்முஸ் நீரிணை' (Strait of Hormuz), இந்த அமெரிக்க-இஸ்ரேல் மற்றும் ஈரான் போரினால் முற்றாக மூடப்பட்டுள்ளது. இது உலக வரலாற்றிலேயே மிக மோசமான எண்ணெய் விநியோகத் தடையை ஏற்படுத்தியுள்ளதாக சர்வதேச எரிசக்தி முகமை (IEA) தெரிவித்துள்ளது.
இதனிடையே, எண்ணெய் சந்தையானது நீண்டகால விநியோகத் தடை மற்றும் அதன் தொடர் அபாயங்களைக் குறைத்து மதிப்பிடுவதாகக் குறிப்பிட்டுள்ள சிட்டி (Citi) வங்கி, எதிர்வரும் நாட்களில் பிரெண்ட் கச்சா எண்ணெய் விலை ஒரு பேரலுக்கு 120 அமெரிக்க டாலர் வரை உயரக்கூடும் என்று கணித்துள்ளது.
இந்தப் போரினால் ஏற்பட்டுள்ள உலகளாவிய விநியோகப் பற்றாக்குறையை ஈடுகட்ட, நாடுகள் தங்களின் வர்த்தக மற்றும் அவசர கால இருப்புக்களை நம்பியிருக்க வேண்டிய சூழல் ஏற்பட்டுள்ளது.
அமெரிக்கப் பெட்ரோலிய நிறுவனம் நேற்று வெளியிட்ட தரவுகளின்படி, அமெரிக்காவில் கச்சா எண்ணெய் இருப்பு தொடர்ந்து ஐந்தாவது வாரமாகக் குறைந்துள்ளது.
மே 15-ஆம் தேதியுடன் முடிவடைந்த வாரத்தில் அமெரிக்காவின் கச்சா எண்ணெய் இருப்பு சுமார் 3.4 மில்லியன் பேரல்கள் குறைந்திருக்கலாம் என்று ராய்ட்டர்ஸ் கருத்துக்கணிப்பு தெரிவிக்கும் வேளையில், இது குறித்த அதிகாரப்பூர்வ வாராந்திரத் தரவுகள் இன்று பிற்பகுதியில் வெளியாகவுள்ளன.
