சுக்மா போட்டிகளை ஒத்திவைக்குமாறு சிலாங்கூர் சுல்தான் விடுத்த ஆணை: முழுமையாக ஆராய்ந்து, உடனடியாக முடிவெடுக்க வேண்டும்

கோலாலம்பூர், ஏப்ரல் 22: சிலாங்கூரில் நடைபெறவிருக்கும் 2026ஆம் ஆண்டுக்கான மலேசிய விளையாட்டுப் போட்டிகளை (சுக்மா) ஒத்திவைப்பது குறித்து சிலாங்கூர் சுல்தான் விடுத்த ஆணையை சுக்மா உயர் மட்டக் குழு முழுமையாக ஆராய்ந்து உடனடியாக ஒரு முடிவை எடுக்க வேண்டும் என்று கேட்டுக் கொள்ளப்பட்டுள்ளது.

மத்திய கிழக்கு நெருக்கடியின் தாக்கம் குறித்த சுல்தானின் கவலை, சம்பந்தப்பட்ட அனைத்துத் தரப்பினராலும் மதிக்கப்பட வேண்டிய ஒரு தொலைநோக்குப் பார்வை என்று நாட்டின் விளையாட்டு ஆய்வாளர் டத்தோ டாக்டர் பெக்கான் ரம்லி கூறினார்.

போட்டிகளை நடத்தும் மாநிலம் என்ற முறையில், சுல்தான் ஷாராஃபுடின் இட்ரிஸ் ஷா அல்ஹாஜ் அவர்களின் பார்வைக்கு வலுவான அடிப்படை உள்ளது. ஏனெனில் தற்போதைய உலக புவிசார் அரசியல் சூழல் உள்நாட்டுப் பொருளாதாரத்தில் சங்கிலித் தொடர் விளைவுகளை ஏற்படுத்தும் என்று அவர் குறிப்பிட்டார்.

"அந்த ஆணைக்கு நாம் இணங்க வேண்டும். சிலாங்கூர் சுல்தான் அவ்வாறு கூறியுள்ளதால், அனைத்துத் தரப்பினரும் இது குறித்து முறையாக விவாதிக்க வேண்டும். இந்த ஆகஸ்ட் மாதம் சுக்மா போட்டிகள் நடைபெறவிருப்பதால், சுக்மா உயர் மட்டக் குழு இதை ஒரு முக்கியப் பிரச்சனையாகக் கருதி உடனடியாக முடிவெடுக்க வேண்டும்."

"மத்திய கிழக்கு நெருக்கடி ஆகஸ்ட் வரை தொடர்ந்தால், நாடு எண்ணெய் மற்றும் பிற நெருக்கடிகளை எதிர்கொண்டால், செலவுகள் பல மடங்கு அதிகரிக்கும் என்பதை நாம் புரிந்துகொள்கிறோம்," என்று அவர் பெர்னாமாவிடம் தொடர்பு கொண்டபோது கூறினார்.

பொருட்கள் மற்றும் சேவைகளின் விலை உயர்வது, போட்டியில் பங்கேற்கும் ஒவ்வொரு மாநிலக் குழுவிற்கும், குறிப்பாக சபா மற்றும் சரவாக் மாநிலங்களுக்கும், நிதி நெருக்கடியை ஏற்படுத்தும் என்றும் பெக்கான் குறிப்பிட்டார்.

இருப்பினும், மலேசியா நடத்தவிருக்கும் 2027ஆம் ஆண்டு தென்கிழக்காசிய விளையாட்டுப் போட்டிகளுக்கு (சீ போட்டி) தேசிய வீரர்களைத் தேர்ந்தெடுக்கும் ஒரு முக்கிய களமாக சுக்மா 2026 விளங்குகிறது என்பதையும் அவர் ஒப்புக்கொண்டார்.

"2027 சீ விளையாட்டு போட்டிகளுக்கான முன் ஏற்பாடுகளையும் நாம் கருத்தில் கொள்ள வேண்டும். போட்டிகள் ஒத்திவைக்கப்பட்டால், அது குழுக்களின் தயாரிப்பு அட்டவணையையும், வீரர்களைத் தேர்ந்தெடுக்கும் செயல்முறையையும் பாதிக்கக்கூடும்."

"உதாரணமாக, ஒத்திவைக்கப்பட்ட 2022ஆம் ஆண்டு சுக்மா போட்டிகள், வயது வரம்பு நிபந்தனைகளில் பாதிப்பை ஏற்படுத்தியது. 21 வயதுக்கு மேற்பட்ட வீரர்களின் போட்டி சாதனைகள் கணக்கில் எடுத்துக்கொள்ளப்படவில்லை," என்றார் அவர்.

இதற்கிடையில், இது குறித்து இளைஞர் மற்றும் விளையாட்டு அமைச்சர் அதிகாரப்பூர்வ அறிக்கை ஒன்றை வெளியிடுவார் என்று தேசிய விளையாட்டு மன்றத்தின் (MSN) தலைமை இயக்குநர், ஜெஃப்ரி ஙடிரின் தெரிவித்தார்.

முன்னதாக, மத்திய கிழக்கு நெருக்கடி முடிவுக்கு வரும் வரையிலும், ஷா ஆலம் விளையாட்டரங்கின் புனரமைப்புப் பணிகள் முழுமையாக முடியும் வரையிலும் சுக்மா சிலாங்கூர் 2026 போட்டிகளை ஒத்திவைக்க சிலாங்கூர் சுல்தான் ஆணை விடுத்திருந்தார்.

இளைஞர் மற்றும் விளையாட்டு அமைச்சர் டாக்டர் முகமது தௌபிக் ஜோஹாரி, அனைத்து மாநிலங்கள் மற்றும் தேசிய விளையாட்டு மன்றத்துடன் இந்த விவகாரத்தை விரிவாக விவாதிக்க சுக்மா 2026 உயர் மட்டக் குழுவின் சிறப்புக் கூட்டம் நடத்தப்படுவதற்கு முன்பு, சிலாங்கூர் மாநில அரசாங்கத்தின் கருத்தைப் பெறுவதாகத் தெரிவித்தார்.

சிலாங்கூர் மாநில அரசாங்கமும் இந்த ஆணை தொடர்பாக மாநில சட்டமன்ற உறுப்பினர்களின் (ADUN) கருத்துக்களையும் பரிசீலிக்கும் என்று அறிவித்துள்ளது.

சுக்மா சிலாங்கூர் 2026 போட்டிகள் ஆகஸ்ட் 15 முதல் 24 வரை நடைபெறத் திட்டமிடப்பட்டுள்ளது.