கோலாலம்பூர், ஏப்ரல் 17: மலேசியாவின் ஏழு மாநிலங்களில் இன்று மதியம் 1 மணி வரை இடி, மின்னலுடன் கூடிய கனமழை பெய்யக்கூடும் என மலேசிய வானிலை ஆய்வு மையம் (மெட்மலேசியா) எச்சரிக்கை விடுத்துள்ளது.
இன்று காலை வெளியிட்ட அதிகாரப்பூர்வ அறிக்கையின்படி, தீபகற்ப மலேசியா மற்றும் கிழக்கு மலேசியாவின் சில பகுதிகளில் வானிலை சீரற்றதாக இருக்கும் என கணிக்கப்பட்டுள்ளது.
இதன்படி, பேரா மாநிலத்தின் பாகான் டத்தோ மற்றும் ஹிலீர் பேராக் ஆகிய இடங்களிலும், பகாங் மாநிலத்தின் மாரான், குவாந்தான், பெரா, பெக்கான் மற்றும் ரொம்பின் ஆகிய மாவட்டங்களிலும் பலத்த மழை பெய்யக்கூடும்.
சிலாங்கூர் மாநிலத்தில் சபாக் பெர்ணம், கோலா சிலாங்கூர், கிள்ளான், கோலா லங்காட் மற்றும் சிப்பாங் ஆகிய பகுதிகள் பாதிக்கப்படலாம் என எதிர்பார்க்கப்படுகிறது. மேலும், நெகிரி செம்பிலான் மாநிலத்தின் போர்ட்டிக்சன் பகுதியிலும், மலாக்கா மாநிலம் முழுவதிலும் இந்த மோசமான வானிலை நீடிக்க வாய்ப்புள்ளது.
ஜோகூர் மாநிலத்தைப் பொறுத்தமட்டில் தங்காக், மூவார், பத்து பஹாட் மற்றும் பொந்தியான் ஆகிய மாவட்டங்களில் பலத்த காற்றுடன் மழை பெய்யக்கூடும் என வானிலை ஆய்வு மையம் தெரிவித்துள்ளது.
அதேவேளையில், கிழக்கு மலேசியாவின் சரவாக் மாநிலத்தில் கூச்சிங், சமரஹான் மற்றும் ஸ்ரீ அமான் ஆகிய பகுதிகளில் இடியுடன் கூடிய மழை பெய்ய வாய்ப்புள்ளது.
பொது மக்கள் தற்காப்பு நடவடிக்கைகளை மேற்கொள்ளுமாறும், குறிப்பாகத் தாழ்வான பகுதிகளில் வசிப்போர் வெள்ள அபாயம் குறித்து விழிப்புடன் இருக்குமாறும் கேட்டுக்கொள்ளப்படுகிறார்கள்.
