ETS மற்றும் ERT இரயில் பயணக் கட்டணத்தில் 30 சதவீதத் தள்ளுபடி; ஏப்ரல் 15 முதல் அமல்

ஷா ஆலம், ஏப்ரல் 14: ஏப்ரல் 15 திங்கள் முதல் வியாழன் வரையிலான பயணங்களுக்கு ETS மற்றும் ERT ரயில் டிக்கெட்டுகளுக்கு 30 விழுக்காடு தள்ளுபடி வழங்கப்படும் என கெரெத்தாப்பி தானா மலாயு பெர்ஹாட் (KTMB) அறிவித்துள்ளது.

இந்த சிறப்புத் தள்ளுபடி மின்சார ரயில் சேவையான (ETS) அனைத்துத் தடங்களுக்கும், ஜோகூர் பாரு சென்ட்ரல் - தும்பாட் இடையிலான எக்ஸ்பிரஸ் ராக்யாட் தீமுர் (ERT) சேவைக்கும் பொருந்தும் என்று போக்குவரத்து அமைச்சர் அந்தோனி லோக் தெரிவித்தார்.

"எரிபொருள் விலை உயர்வைக் கையாள ரயில் பயன்பாட்டை ஊக்குவிக்கும் பிரச்சாரத்தை" புத்ராஜெயாவில் இன்று தொடங்கி வைத்தபோது அவர் இதனைத் தெரிவித்தார்.

பொதுப் போக்குவரத்தின் பயன்பாட்டை ஊக்குவிக்கும் மடாணி அரசாங்கத்தின் தொடர்ச்சியான முயற்சிகளின் ஒரு பகுதியாக திங்கள் முதல் வியாழன் வரையிலான பயணங்களுக்கு இந்தத் தள்ளுபடி வழங்கப்படுகிறது. இது பயணச் செலவுகளைக் குறைப்பதுடன், பொது மக்களின் இயக்கத்தை அதிகரித்து, நீடித்த மற்றும் அனைவரையும் உள்ளடக்கிய போக்குவரத்து அமைப்புக்கு ஆதரவளிக்கும் என்றும் அவர் கூறினார்.

இருப்பினும், உச்சக்கட்டப் பயண நேரங்களில் திறமையான ரயில் நிர்வாகத்தை உறுதி செய்வதற்காக, பள்ளி விடுமுறைகள் மற்றும் பொது விடுமுறை நாட்களில் இந்த 30 விழுக்காடு தள்ளுபடி பொருந்தாது.

இந்தக் குறைந்த கட்டணத்தை அனுபவிக்க, பயணிகள் KTMB அறிவிக்கும் விளம்பரக் குறியீட்டைப் (promo code) பயன்படுத்த வேண்டும்.

விளம்பர முன்பதிவு காலம் ஏப்ரல் 15 முதல் ஏப்ரல் 30 வரை ஆகும். அதே வேளையில், பயணத்திற்கான தள்ளுபடி ஏப்ரல் 15 முதல் அக்டோபர் 14 வரை செல்லுபடியாகும்.

ETS வணிக வகுப்பு (Business Class), ERT முதல் வகுப்பு மற்றும் படுக்கை வகுப்பு (Sleeper Class) பயணச்சீட்டுகள் மற்றும் ஏற்கனவே சலுகை அட்டை வைத்திருப்போருக்கு இந்தத் தள்ளுபடி பொருந்தாது என்று அந்தோணி லோக் தெளிவுபடுத்தினார்.

எனவே, பொதுமக்கள் தங்கள் பயணங்களை முன்கூட்டியே திட்டமிட்டு, இந்தச் சலுகையைப் பயன்படுத்தி இருக்கைகளைப் பெற்று பயனடையுமாறு அறிவுறுத்தப்படுகிறார்கள்.

மேலும் தகவல்களுக்கு விளம்பரக் குறியீட்டைப் பெறவும், பயணிகள் KTMB-இன் அதிகாரப்பூர்வ இணையதளமான www.ktmb.com.my-ஐப் பார்வையிடலாம் அல்லது அதன் அதிகாரப்பூர்வ சமூக ஊடகப் பக்கங்களைப் பின்தொடரலாம்.