கோலாலம்பூர், ஏப்ரல் 13 - நாட்டின் பல்வேறு மாநிலங்களில் இன்று மாலை 5 மணி வரை இடியுடன் கூடிய பலத்த மழை மற்றும் பலத்த காற்று வீசக்கூடும் என மலேசிய வானிலை ஆய்வு மையம் (மெட்மலேசியா) எச்சரிக்கை விடுத்துள்ளது.
வடக்கு மாநிலமான கெடாவில் சிக், பாலிங், கூலிம் மற்றும் பண்டார் பாரு ஆகிய பகுதிகளும், பினாங்கில் செபராங் பிறை உத்தாரா, தெங்கா மற்றும் செலாத்தான் ஆகிய பகுதிகளும் மோசமான வானிலையைச் சந்திக்கும் என எதிர்பார்க்கப்படுகிறது.
பேராக் மாநிலத்தில் கிரியான், லாரூட், மாதாங் மற்றும் செலாமா, உலு பேராக், கோலா கங்சார், பாதாங் பாடாங் மற்றும் முவாலிம் ஆகிய இடங்களில் இந்த எச்சரிக்கை விடுக்கப்பட்டுள்ளது. அதே வேளையில், பஹாங்கில் ரவூப், ஜெராண்டுட், பெந்தோங், குவாந்தான், பெக்கான் மற்றும் ரொம்பின் ஆகிய மாவட்டங்கள் மழையினால் பாதிக்கப்படலாம்.
சிலாங்கூர் மாநிலத்தைப் பொறுத்தவரை உலு சிலாங்கூர், கோம்பாக் மற்றும் உலு லங்காட் ஆகிய பகுதிகளுடன் கோலாலம்பூர் மாநகரமும் இந்த வானிலை எச்சரிக்கை வளையத்திற்குள் கொண்டு வரப்பட்டுள்ளன.
தென் மாநிலங்களான நெகிரி செம்பிலானில் சிரம்பான் மற்றும் ரெம்பாவ் ஆகிய இடங்களிலும், ஜோகூரில் மெர்சிங், பொந்தியான், கூலாய், கோத்தா திங்கி மற்றும் ஜோகூர் பாரு ஆகிய பகுதிகளிலும் பலத்த மழை பெய்யக்கூடும்.
மேலும், கிழக்கு மலேசியாவின் சபாவில் உட்புறப் பகுதிகள், மேற்கு கடற்கரை, தாவாவ் மற்றும் கூடாட் ஆகிய இடங்களிலும் இந்த மோசமான வானிலை நீடிக்கும் எனத் கணிக்கப்பட்டுள்ளது.
ஒரு மணிநேரத்திற்கு 20 மில்லி மீட்டருக்கும் அதிகமான மழைப்பொழிவு பதிவாகும் போதும், மழையின் தீவிரம் ஒரு மணி நேரத்திற்கும் மேலாக நீடிக்கும் என எதிர்பார்க்கப்படும் போதும் இத்தகைய எச்சரிக்கைகள் விடுக்கப்படுவதாக மெட்மலேசியா விளக்கியுள்ளது.
இது ஒரு குறுகிய கால எச்சரிக்கை என்பதால், பொதுமக்கள் அனைவரும் மிகுந்த எச்சரிக்கையுடன் இருக்குமாறும், மோசமான வானிலை நிலவும் வேளையில் வெளிப்புற நடவடிக்கைகளைத் தவிர்த்துக் கொள்ளுமாறும் அறிவுறுத்தப்படுகிறார்கள்.
