ஷா ஆலம், ஏப்ரல் 12: மலேசியாவின் பல மாநிலங்களில் இன்று மாலை 5 மணி வரை இடியுடன் கூடிய கனமழை பெய்யக்கூடும் என மலேசிய வானிலை ஆய்வு மையம் (மெட்மலேசியா) எச்சரிக்கை விடுத்துள்ளது.
வளிமண்டல மாற்றங்கள் காரணமாக நாட்டின் பல்வேறு பகுதிகளில் சீரற்ற வானிலை நிலவக்கூடும் என்பதால் பொதுமக்கள் மிகுந்த கவனத்துடன் இருக்குமாறு கேட்டுக்கொள்ளப்படுகிறார்கள்.
வட மாநிலமான கெடாவில் பாலிங் மற்றும் கூலிம் ஆகிய பகுதிகள் பாதிக்கப்படக்கூடும் என கணிக்கப்பட்டுள்ளது. பேராக் மாநிலத்தில் லாருட், மாடாங் மற்றும் செலாமா, கோலா கங்சார், கிந்தா, கம்பார், பாதாங் பாடாங் மற்றும் முவாலிம் ஆகிய மாவட்டங்களுக்கும் இந்த எச்சரிக்கை விடுக்கப்பட்டுள்ளது.
பகாங் மாநிலத்தில் கேமரன் மலை, லிப்பிஸ், ரவுப், பெந்தோங், பெரா மற்றும் ரொம்பின் ஆகிய இடங்களிலும், சிலாங்கூர் மாநிலத்தில் உலு சிலாங்கூர், கோம்பாக் மற்றும் உலு லங்காட் ஆகிய பகுதிகளுடன் கோலாலம்பூர் கூட்டரசு பிரதேசத்திலும் பலத்த மழை எதிர்பார்க்கப்படுகிறது.
நெகிரி செம்பிலானில் ஜெலுபு, கோலா பிலா மற்றும் ஜெம்போல் ஆகிய இடங்களிலும், ஜோகூர் மாநிலத்தில் செகாமட், குளுவாங், மெர்சிங் மற்றும் கோத்தா திங்கி ஆகிய பகுதிகளிலும் மோசமான வானிலை நிலவக்கூடும்.
கிழக்கு மலேசியாவைப் பொறுத்தவரை, சரவாக்கில் கூச்சிங், செரியான், சமரஹான், ஸ்ரீ அமான், பெத்தோங், சரிக்கே, சிபு, முக்கா மற்றும் பிந்துலு ஆகிய பகுதிகளும், சபாவில் உட்புறப் பகுதிகள், மேற்கு கடற்கரை, தாவாவ், சண்டாக்கான் மற்றும் கூடாட் ஆகிய இடங்களும் இந்த வானிலை எச்சரிக்கப் பட்டியலில் இடம்பெற்றுள்ளன.
வானிலை ஆய்வு மையத்தின் தகவல்படி, ஒரு மணிநேரத்தில் 20 மில்லிமீட்டருக்கும் அதிகமான மழைப்பொழிவு பதிவாகும் அறிகுறிகள் தென்படும்போது அல்லது அத்தகைய மழைப்பொழிவு ஒரு மணிநேரத்திற்கும் மேலாக நீடிக்கும் என்று எதிர்பார்க்கப்படும்போது இந்த எச்சரிக்கை விடுக்கப்படுகிறது.
இடியுடன் கூடிய மழைக்கான இந்த எச்சரிக்கை ஆறு மணிநேரத்திற்கு மிகாமல் செல்லுபடியாகும் குறுகிய கால அறிவிப்பாகும். எனவே, மோசமான வானிலை நிலவும் காலங்களில் பொதுமக்கள் வெளியில் செல்வதைத் தவிர்க்கவும், பாதுகாப்பான இடங்களில் இருக்கவும் அறிவுறுத்தப்படுகிறார்கள்.
