ஷா ஆலம், ஏப்ரல் 12: எரிபொருள் மானியக் கசிவைத் தடுப்பதற்கும், பெட்ரோல் நிலையங்கள் சட்டதிட்டங்களுக்கு உட்பட்டு நடப்பதை உறுதி செய்வதற்கும், உள்நாட்டு வணிகம் மற்றும் வாழ்க்கைச் செலவின அமைச்சு (KPDN) கிள்ளான் மற்றும் ஷா ஆலம் பகுதிகளில் கண்காணிப்பு நடவடிக்கைகளை மேற்கொண்டுள்ளது.
நேற்று நடைபெற்ற இந்தச் சோதனையில் செத்தியா ஆலாம், கேசாஸ் (KESAS) நெடுஞ்சாலை, கிள்ளான் பண்டார் பாரு, ரந்தாவ் பாஞ்சாங், கம்போங் பத்து பெலா மற்றும் ஷாபாடு (SHAPADU) நெடுஞ்சாலை ஆகிய பகுதிகளில் உள்ள முக்கிய எரிபொருள் நிலையங்கள் இலக்கு வைக்கப்பட்டன.
சிலாங்கூர் மாநில அமைச்சின் அதிகாரப்பூர்வ முகநூல் பக்கத்தில் வெளியிடப்பட்ட அறிக்கையின்படி, 'ஓப்ஸ் தீரிஸ் 4.0' (Ops Tiris 4.0) எனும் திட்டத்தின் கீழ் இந்தக் கண்காணிப்பு மேற்கொள்ளப்பட்டது.
எரிபொருள் கடத்தப்படுவதைத் தடுப்பதையும், அரசாங்கத்தின் மானியம் முறைகேடாகப் பயன்படுத்தப்படுவதைத் தவிர்ப்பதையும் நோக்கமாகக் கொண்டு நடத்தப்பட்ட இந்த ஆய்வில், பெரும்பாலான நிலையங்களில் எரிபொருள் விநியோகம் போதுமான அளவில் இருப்பதும், உரிமையாளர்கள் விதிமுறைகளைச் சரியாகப் பின்பற்றுவதும் உறுதி செய்யப்பட்டது.
குறிப்பாக, வெளிநாட்டுப் பதிவு எண்களைக் கொண்ட வாகனங்களுக்கு RON95 பெட்ரோல் மற்றும் டீசல் விற்பனை செய்யப்படுவதைத் தடுப்பதற்கான தடையை நிலைய உரிமையாளர்கள் முறையாகக் கடைப்பிடிக்கின்றனரா என்பதும் தீவிரமாகப் பரிசோதிக்கப்பட்டது.
அதே வேளையில், அமைச்சின் அமலாக்கப் பிரிவினர் அம்பாங் மற்றும் காஜாங் பகுதிகளில் உள்ள வணிக வளாகங்களிலும் தனித்தனியான சோதனைகளை மேற்கொண்டனர்.
கட்டுப்பாட்டுப் பொருட்களின் இருப்பு மற்றும் வணிகத்தில் பயன்படுத்தப்படும் எடைக்கருவிகளின் துல்லியம் ஆகியவற்றை உறுதி செய்வதே இச்சோதனையின் நோக்கமாகும்.
இதன் விளைவாக, நிர்ணயிக்கப்பட்ட காலத்திற்குள் எடைக்கருவிகளை மறுபரிசீலனை செய்து சான்றளிக்கத் தவறிய ஆறு வணிக வளாகங்களுக்கு அமலாக்க அதிகாரிகள் உடனடியாக அபராதம் விதித்தனர்.
நுகர்வோரின் நலனைப் பாதுகாப்பதற்கும், சந்தையில் அத்தியாவசியப் பொருட்களின் தட்டுப்பாட்டைத் தவிர்ப்பதற்கும் இத்தகைய அதிரடிச் சோதனைகள் தொடர்ச்சியாக நடத்தப்படும் என்று அமைச்சு திட்டவட்டமாகத் தெரிவித்துள்ளது.
