பொருளாதார வளர்ச்சிக்கு எரிபொருள் மற்றும் அடிப்படைப் பொருட்கள் தடையின்றி கிடைப்பதை உறுதி செய்ய அரசு தீவிரம்

கோலாலம்பூர், ஏப்ரல் 10 - பொருளாதார நடவடிக்கைகள் தொடர்ந்து நடைபெறுவதை உறுதி செய்வதற்காக, எரிபொருள் மற்றும் அத்தியாவசியப் பொருட்களின் விநியோகம் போதுமானதாக இருப்பதை உறுதி செய்வதில் அரசாங்கம் கவனம் செலுத்துகிறது என்று பொருளாதார அமைச்சர் அக்மால் நஸ்ருல்லா முகமட் நசிர் கூறினார்.

உலகளாவிய எரிசக்தி நெருக்கடியின் காரணமாக எரிபொருள் விநியோகப் பிரச்சனை மிகப்பெரிய சவாலாக உருவெடுத்துள்ளதாகவும், விநியோகம் போதுமானதாக இருப்பதை உறுதி செய்வதே நாட்டின் முன்னுரிமை என்றும் அவர் கூறினார்.

"உலக வங்கி போன்ற அமைப்புகளின் பார்வைகளை ஆராயும்போது, தற்போதைய நெருக்கடி விநியோகம் தொடர்பான பிரச்சனை என்பதை நாம் அறிவோம்."

"எனவே, பொருளாதார நடவடிக்கைகள் தொடர்ந்து நடைபெறுவதை உறுதி செய்வதற்காக, எரிபொருள் மற்றும் அத்தியாவசியப் பொருட்களின் விநியோகத்திற்கு உத்தரவாதம் அளிப்பதில் நாம் கவனம் செலுத்த வேண்டும்," என்று அவர் பெர்னாமாவிடம் கூறினார்.

பெர்னாமா தொலைக்காட்சி தயாரித்த 'உலகளாவிய எரிசக்தி நெருக்கடியை எதிர்கொள்ளுதல்: பொருளாதார மீட்சியை வலுப்படுத்தும் முயற்சிகள்' எனும் தலைப்பிலான 'ருவாங் பிச்சாரா' நிகழ்ச்சியில் விருந்தினராகக் கலந்துகொள்வதற்கு முன்பு அவர் இவ்வாறு தெரிவித்தார்.

மலேசியாவின் எரிபொருள் விநியோகம் குறைந்தபட்சம் ஜூன் மாதம் வரை போதுமானதாக இருக்கும் என்று பிரதமர் டத்தோஸ்ரீ அன்வார் இப்ராஹிம் முன்பு கூறியதைக் குறிப்பிட்ட அக்மால் நஸ்ருல்லா, அந்தக் காலகட்டத்திற்குப் பிறகும் விநியோகத் தொடர்ச்சியை உறுதி செய்ய பெட்ரோலியம் நேஷனல் பெர்ஹாட் (பெட்ரோனாஸ்) முயற்சி செய்து வருவதாகத் தெரிவித்தார்.

"அதே நேரத்தில், பல நாடுகள் உள்நாட்டுத் தேவைகளுக்கு முன்னுரிமை அளிக்கத் தொடங்கியுள்ள போக்கையும் நாங்கள் கவனித்து வருகிறோம். சில நாடுகள் பண்டமாற்று முறை போன்ற தூதரக உறவுகளை நாடும் என்று நான் எதிர்பார்க்கிறேன்."

"பிற நாடுகளுடனான உறவுகளின் மூலம் நாட்டின் நலன்கள் பாதுகாக்கப்படுவதை உறுதி செய்வதற்காக ஆராயப்பட வேண்டிய உத்திகளில் இதுவும் ஒன்றாக இருக்கும்," என்றார் அவர்.

உலகளாவிய எரிசக்தி நெருக்கடி, பயோ டீசல் பயன்பாடு போன்ற முன்முயற்சிகளை முன்னெடுக்க அரசாங்கத்திற்கு வாய்ப்பளித்துள்ளதாகவும் அக்மால் நஸ்ருல்லா விவரித்தார்.

"(நெருக்கடி தணிந்தவுடன்) பயோ டீசலை ஒரு மாற்று வழியாக மட்டும் பார்த்து மறந்துவிடுவதை நாங்கள் விரும்பவில்லை. தற்போதைய நெருக்கடியை எதிர்கொள்வதில் மட்டும் சுறுசுறுப்பாக இல்லாமல், (பயோ டீசலின்) நீண்டகால மீள்தன்மையை உறுதி செய்வதே ஒரு சவாலாகும்," என்று அவர் கூறினார்.