தங்காக், ஏப்ரல் 8 – புக்கிட் கம்பீர் பகுதியில் இருந்து மூவார் நோக்கிச் சென்றுகொண்டிருந்த வழித்தடப் பேருந்து ஒன்றில் பயணித்த 64 வயது மதிக்கத்தக்க மூதாட்டி ஒருவர், எதிர்பாராத விதமாக உயிரிழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது.
இந்தத் துயரச் சம்பவம் குறித்து ஊடகங்களுக்குத் தகவல் தெரிவித்த தங்காக் மாவட்ட காவல்துறைத் தலைவர் சூப்பிரிடெண்டண்ட் ரோஸ்லான் முகமட் தாலிப், நேற்று காலை சுமார் 10.45 மணியளவில் பேருந்து ஓட்டுநரிடமிருந்து தங்களுக்குப் புகார் வந்ததாகக் குறிப்பிட்டார். பேருந்து பயணித்துக் கொண்டிருந்தபோது, இருக்கையில் அமர்ந்திருந்த அந்தப் பெண்மணி நீண்ட நேரமாக அசைவின்றி மயக்க நிலையில் இருந்ததை ஓட்டுநர் கவனித்துள்ளார்.
இதனையடுத்து உடனடியாகப் புக்கிட் கம்பீர் சுகாதார நிலைய மருத்துவ அதிகாரிகளுக்குத் தகவல் தெரிவிக்கப்பட்டது. சம்பவ இடத்திற்கு விரைந்து வந்த மருத்துவக் குழுவினர், அந்தப் பெண்மணியைப் பரிசோதித்து, அவர் ஏற்கனவே உயிரிழந்துவிட்டதை உறுதிப்படுத்தினர்.
உயிரிழந்தவரின் உடல் பிரேதப் பரிசோதனைக்காகத் தங்காக் மருத்துவமனைக்குக் கொண்டு செல்லப்பட்டது. பிரேதப் பரிசோதனை முடிவுகளின்படி, அந்தப் பெண்மணிக்கு ஏற்பட்ட திடீர் இதயக் கோளாறு காரணமாகவே இந்த மரணம் நிகழ்ந்துள்ளதாகக் காவல்துறை தரப்பில் தெரிவிக்கப்பட்டுள்ளது.
தற்போது இந்தச் சம்பவம் தொடர்பாகத் தீவிர விசாரணை நடைபெற்று வரும் நிலையில், இது குறித்து ஏதேனும் கூடுதல் தகவல்கள் தெரிந்த பொதுமக்கள் அருகிலுள்ள காவல் நிலையத்தையோ அல்லது தங்காக் மாவட்டத் தலைமையகத்தின் செயல்பாட்டு அறையையோ 06-9785222 எனும் எண்களில் தொடர்பு கொண்டு தகவல் வழங்குமாறு கேட்டுக்கொள்ளப்படுகிறார்கள்.
