ஜகார்த்தா, ஜன 23- ஜாகார்த்தாவில் உள்ள இஸ்டோரா செனாயன் மைதானத்தில் நடைபெற்று வரும் 2026-ஆம் ஆண்டுக்கான இந்தோனேசிய மாஸ்டர்ஸ் பேட்மிண்டன் தொடரில், மலேசியாவின் முன்னணி மகளிர் இரட்டையர் ஜோடியான பெர்லி டான் - எம். தினா ஜோடி காலிறுதிக்கு முன்னேறியது.
இன்று நடைபெற்ற இரண்டாவது சுற்று ஆட்டத்தில், உலகின் இரண்டாம் நிலை ஜோடியான இவர்கள் தைவானின் லின் சியாவ் மின் - வாங் யு சியாவ் இணையை 21-13, 21-12 என்ற நேர் செட்களில் 48 நிமிடங்களில் வீழ்த்தினர்.
காலிறுதிப் போட்டியில் இவர்கள் ஜப்பான் அல்லது தென்கொரிய ஜோடியை எதிர்கொள்ளவுள்ளனர்.அதேபோல், மலேசியாவின் ஆண்கள் இரட்டையர் பிரிவில் மான் வெய் சோங் - டீ கை வுன் ஜோடியும் காலிறுதிக்கு தகுதி பெற்றது.
இந்திய ஜோடியான ஹரிஹரன் அம்சகருணன் - எம்.ஆர். அர்ஜுன் இணையை 21-17, 9-21, 21-16 என்ற கணக்கில் 54 நிமிடங்கள் போராடி இவர்கள் வென்றனர்.
அடுத்த சுற்றில் இவர்கள் இந்தோனேசியாவின் சபர் கார்யமான் குடாமா - முகமது ரேசா பஹ்லேவி இஸ்பஹானி என்ற வலுவான ஜோடியை எதிர்கொள்ள உள்ளனர்.
மகளிர் ஒற்றையர் பிரிவில், மலேசியாவின் கே. லெட்சனா கனடாவின் மிச்செல் லீயை 21-14, 21-14 என்ற கணக்கில் வீழ்த்தி காலிறுதிக்கு முன்னேறி அசத்தினார்.இருப்பினும், ஆண்கள் ஒற்றையர் பிரிவில் மலேசியாவின் நட்சத்திர வீரர் லீ ஜி ஜியா அதிர்ச்சித் தோல்வியடைந்து தொடரிலிருந்து வெளியேறினார்.
தாய்லாந்தின் பானிட்சபோன் டீராட்சாகுலிடம் 21-15, 17-21, 8-21 என்ற கணக்கில் அவர் தோல்வியைத் தழுவினார். அதேபோல, கலப்பு இரட்டையர் பிரிவில் ஹூ பாங் ரோன் - செங் சு யி ஜோடி சீனாவின் குவோ சின் வா - சென் ஃபாங் ஹுய் இணையிடம் 13-21, 19-21 என்ற கணக்கில் தோல்வியடைந்து வெளியேறியது.a
