சிலாங்கூர், ஜன 13 - விசிட் மலேசியா 2026 (VM2026) திட்டத்தை முன்னிட்டு சுற்றுலாத் துறையில் ஈடுபட்டுள்ள 10,000 பேருக்கு தொழில் பாதுகாப்பு மற்றும் சுகாதாரம் சார்ந்த பயிற்சிகளை மனிதவள அமைச்சு இலவசமாக வழங்கவுள்ளது.
சுற்றுலா துறைக்கான இந்தப் பாதுகாப்பு அறிமுகப் பயிற்சி (SITI) திட்டத்தை, சுற்றுலா, கலை மற்றும் கலாச்சார அமைச்சான மோதேக்வுடன் இணைந்து தேசிய தொழிலாளர் பாதுகாப்பு மற்றும் சுகாதார நிறுவனம் (NIOSH) நடத்தும் என்று மனிதவள அமைச்சர் டத்தோ ஸ்ரீ ரமணன் ராமகிருஷ்ணன் கூறினார்.
இந்த பயிற்சி, சுற்றுலா வழிகாட்டிகள், சுற்றுலா தொழில் நடத்துநர்கள், பணியாளர்கள், ஒப்பந்ததாரர்கள் மற்றும் தங்குமிட வழங்குநர்கள் ஆகியோருக்காக வடிவமைக்கப்பட்டுள்ளது. பணியிடங்களில் விபத்துகளைத் தடுப்பது, அபாயங்களை கட்டுப்படுத்துவது மற்றும் 2022 தொழிலாளர் பாதுகாப்பு சட்டத் திருத்தங்களை பின்பற்றுவது குறித்து பயிற்சி வழங்கப்படும் என ரமணன் ராமகிருஷ்ணன் தெரிவித்தார்.
இந்த பயிற்சித் திட்டத்திற்காக 26 லட்சத்து 50,000 ரிங்கிட் நிதி ஒதுக்கப்பட்டுள்ளதாக அவர் குறிப்பிட்டார்.
நாடு முழுவதும் உள்ள NIOSH அலுவலகங்களில் நேரடியாக அல்லது இயங்கலை வாயிலாக ஏழு மணி நேரம் மட்டுமே இப்பயிற்சித் திட்டம் நடத்தப்படுவதாக ரமணன் குறிப்பிட்டார்.
இந்த பயிற்சியை வெற்றிகரமாக முடிப்பவர்களுக்கு 2 ஆண்டுகள் செல்லுபடியாகும் டிஜிட்டல் பாதுகாப்பு பாஸ்போர்ட் வழங்கப்படும். இதன் மூலம், உள்நாடு மற்றும் வெளிநாடுகளில் காப்பீட்டு பாதுகாப்பும் கிடைக்கும்.
இப்பயிற்சியில் பங்கேற்பதற்கான இணைய விண்ணப்பங்கள் எதிர்வரும் ஜனவரி 25ஆம் தேதி முதல் www.niosh.com.my என்ற இணையத்தளத்தில் திறக்கப்படும் என்று அவர் மேலும் விவரித்தார்.
பெர்னாமா
