ஷா ஆலம், மார்ச் 2- சிலாங்கூரில் இன்று 73,938 மாணவர்கள் எஸ்.பி.எம். தேர்வை எழுதுகின்றனர். தனியார் மாணவர்களும் தேர்வு எழுதுவோரில் அடங்குவர்.
எனினும், மொத்தம் மாணவர்களில் 73,719 மாணவர்கள் மட்டுமே இன்று தேர்வை எழுதுகின்றனர். எஞ்சிய 219 மாணவர்கள் கோவிட்-19 நோய்த் தொற்று காரணமாகத் தனிமைப்படுத்தப் பட்டுள்ளனர் என்று மாநிலக் கல்வித் துறையின் கற்றல் பிரிவு துணை இயக்குநர் டத்தின் நோர் பரிடா ஏ பாக்கார் கூறினார்.
மாநில முழுவதும் 508 தேர்வு மையங்கள் திறக்கப்பட்டுள்ளதாகக் கூறிய அவர், மாணவர்கள் அனைவரும் நிதானத்துடனும் கவனத்துடனும் தேர்வை எழுதுவர் என எதிர்பார்ப்பதாகச் சொன்னார்.
இங்குள்ள செக்சன் 7 தேசிய இடைநிலைப்பள்ளியில் மாணவர்கள் தேர்வு எழுதுவதைப் பார்வையிட்ட பின்னர்ச் செய்தியாளர்களிடம் அவர் இதனைத் தெரிவித்தார்.
இப்பள்ளியைச் சேர்ந்த 381 மாணவர்கள் இவ்வாண்டு எஸ்.பி.எம். தேர்வை எழுதுவதாகவும் அவர் குறிப்பிட்டார்.
