ஷா ஆலம், ஜூன் 18: ஹார்முஸ் நீரிணை மீண்டும் திறக்கப்படுவது உலகப் பொருளாதாரத்தில் சாதகமான தாக்கத்தை ஏற்படுத்தும் என்று எதிர்பார்க்கப்பட்ட போதிலும், பொதுமக்கள் தொடர்ந்து விவேகமான நிதி நிர்வாகத்தைக் கடைப்பிடிப்பதோடு, அவசரப்பட்டு முதலீட்டு முடிவுகளை எடுப்பதைத் தவிர்க்க வேண்டும் என்று அறிவுறுத்தப்பட்டுள்ளது.
பொதுமக்கள் தங்களின் நிதி சார்ந்த முடிவுகளை மிகவும் துல்லியமாக எடுப்பதற்கு ஏதுவாக, நடப்புப் பொருளாதாரம், சந்தை நிலவரம் மற்றும் நிதித்துறை முன்னேற்றங்களை எப்போதும் உன்னிப்பாகக் கண்காணித்து வர வேண்டும் என்று பேங்க் முஅமலாட் மலேசியா பெர்ஹாட்டின் தலைமைப் பொருளாதார நிபுணர் டாக்டர் முகமட் அஃப்ஸாநிசாம் அப்துல் ரஷித் கூறியுள்ளார்.
மேற்கு ஆசியாவில் நிலவி வந்த பதற்றமான சூழல் தணிவதற்கான அறிகுறிகள் தென்பட்டாலும், உலகப் பொருளாதாரமானது இன்னும் புவிசார் அரசியல் நிச்சயமற்ற தன்மைகளின் தாக்கத்திற்கு உட்பட்டே இருப்பதால், துல்லியமான மற்றும் நம்பகமான நடப்புத் தகவல்களைப் பெற்றிருப்பது மிகவும் அவசியமாகும்.
பொருளாதாரம் மற்றும் நிதிச் சந்தையின் தற்போதைய நிலவரங்களை மக்கள் நன்கு தெரிந்து வைத்திருப்பது, முதலீடுகள் போன்ற முக்கிய விவகாரங்களில் உணர்ச்சிவசப்படாமலும், அடுத்தவர்களின் பேச்சைக் கேட்டு ஏமாறாமலும், சரியான முடிவுகளை எடுக்க உதவும் என்று அவர் மீடியா சிலாங்கூர் ஊடகத்திடம் விவரித்தார். சரியான தகவல்களைத் திரட்டுவது எப்போதும் ஒரு சிறந்த நிதி முடிவுக்கு வழிவகுக்கும் என்றும் அவர் சுட்டிக்காட்டினார்.
ஹார்முஸ் நீரிணை மீண்டும் திறக்கப்படுவதன் வழி உலகளாவிய கச்சா எண்ணெய் விலை குறைவதற்கும், சந்தையில் நேர்மறையான சூழல் ஏற்படுவதற்கும் வாய்ப்புகள் உருவாகியுள்ளன.
அதற்காக, இத்தகைய சாதகமான சூழலைக் கண்டு பொதுமக்கள் அவசர அவசரமாக நிதி முடிவுகளை எடுக்கக் கூடாது என்றும், மாறாக, ஒவ்வொரு குடும்பத்தின் நிதி நிலையாக இருப்பதை உறுதி செய்ய சிக்கனமான செலவினக் கொள்கையைத் தொடர்ந்து கடைப்பிடிப்பதே முக்கியம் என்றும் அவர் வலியுறுத்தினார்.
நிதி சார்ந்த எந்தவொரு முடிவிலும் எப்போதும் நிதானத்தையும் எளிமையையும் கடைப்பிடிப்பது, எதிர்காலத்தில் ஒரு சிறந்த நல்வாழ்வை அனுபவிக்கத் துணைபுரியும் என்றும் அவர் மேலும் கூறினார்.
இதற்கிடையில், தீவிரப் பேச்சுவார்த்தைகளுக்குப் பிறகு அமெரிக்காவிற்கும் ஈரானுக்கும் இடையே அமைதி ஒப்பந்தம் எட்டப்பட்டுள்ளதாகப் பாகிஸ்தான் பிரதமர் ஷெஹ்பாஸ் ஷெரீப் கடந்த திங்கள்கிழமை அறிவித்திருந்தார்.
லெபனான் உட்பட அனைத்து மோதல் பகுதிகளிலும் ராணுவ நடவடிக்கைகள் உடனடியாகவும் நிரந்தரமாகவும் நிறுத்தப்படுவதாக இரு தரப்பும் அறிவித்துள்ள வேளையில், இதற்கான அதிகாரப்பூர்வ ஒப்பந்தக் கையெழுத்து விழா எதிர்வரும் ஜூன் 19-ஆம் தேதி சுவிட்சர்லாந்தில் நடைபெறவிருப்பது குறிப்பிடத்தக்கது.
