ஷா ஆலம், ஜூன் 9- சிலாங்கூர் மாநிலத்தில் தொழில்துறைகளை காப்பாற்றுவற்கும் பொருளாதார நடவடிக்கைள் தொடர்ந்து துடிப்புடன் செயல்படுவதை உறுதி செய்வதற்கும் ஏதுவாக பல்வேறு திட்டங்களை மாநில அரசு அமல் செய்கிறது.
கித்தா சிலாங்கூர் 2.0 திட்டத் தொகுப்பின் இரண்டாம் வியூகத்தின் கீழ் அமல் செய்யப்படும் திட்டங்கள் வருமாறு-
- சிலாங்கூர் அட்வான்ஸ் – பல்வேறு கடனுதவித் திட்டங்கள் வாயிலாக சிறு மற்றும் நடுத்தர தொழில்துறையினருக்கு உதவும் நோக்கில் கூடுதலாக 20 கோடி வெள்ளி ஒதுக்கீடு செய்வது.
- உணவு விநியோக உத்தரவாதத் திட்டம் – சுழல் நிதியாக ஒரு கோடி வெள்ளியை ஒதுக்கீடு செய்வது மற்றும் உணவு சுழற்றி நிலையாக இருப்பதை உறுதி செய்ய சந்தை கிளைகளை அமைப்பது.
- விவசாய பரிவுத் திட்டம்- விவசாய பொருள்களை விவசாயிகளிடமிருந்து வாங்கி ஐம்பது விழுக்காட்டு விலைக் கழிவில் பொதுமக்களுக்கு விற்பனை செய்யும் இத்திட்டத்திற்கு 15 லட்சம் வெள்ளி ஒதுக்கீடு செய்வது.
- உற்பத்தி பெருக்கத் திட்டம்- பல்வேறு அணுமுறைகளின் வாயிலாக விவசாயிகளும் கால் நடை வளர்ப்போரும் தங்கள் வருமானத்தை பெருக்கி கொள்வதற்கு உதவ 19 லட்சத்து 30 ஆயிரம் வெள்ளி ஒதுக்கீடு செய்யப்படும். நெல் விதைகள் வழங்குவது மற்றும் பூச்சிக் கொல்லி மருந்துகளை விநியோகிப்பதும் இதில் அடங்கும்.
- ஹிஜ்ரா கடனுதவித் திட்டம்- வர்த்தகத்தை புதிதாக தொடக்கும் சுமார் எட்டாயிரம் தொழில் முனைவோருக்கு தொடக்க மூலதன நிதியாக வழங்க 8 கோடி வெள்ளியை ஒதுக்கீடு செய்வது. நடமாட்டக் கட்டுப்பாடு ஆணை காரணமாக வேலை இழந்தவர்கள் மற்றும் வருமான இழப்பிற்கு ஆளானவர்களுக்கு இத்திட்டத்தில் முன்னுரிமை அளிக்கப்படும்.
- பிளாட்ஸ் சிலாங்கூர் திட்டம்- அங்காடி வியாபாரிகள் மற்றும் சில்லரை வியாபாரிகள் இலக்கவியல் பற்றிய அடிப்படைக் கல்வி மற்றும் தொழில் முனைவோர் பயிற்சி பெறுவதற்கும் ஏதுவாக இத்திட்டத்தை விரிவுபடுத்துவது
- சுற்றுலாத் துறைக்கு நிதியுதவி- மாநிலத்தில் சுற்றுலாத் துறையை மேம்படுத்த 25 லட்சத்து 50 ஆயிரம் வெள்ளி ஒதுக்கீடு. சுற்றுலா நடவடிக்கைளுக்கு கடனுதவி, சுற்றுலா பற்றுச் சீட்டு 2.0 திட்டம் ஆகியவற்றோடு ஒரு முறை மட்டுமே வழங்கக்கூடிய நிதியுதவித் திட்டமும் அமல் செய்யப்படும்.
