ஷ ஆலம், மே 19- கோவிட்-19 நோய்த் தொற்றுப் பிரச்னைக்கு நிரந்தரத் தீர்வு ஏற்படும் என்றால் சிலாங்கூர் மாநிலத்தில் முழு அளவிலான நடமாட்டக் கட்டுப்பாட்டு ஆணையை அவசியம் அமல்படுத்தித் தான் ஆக வேண்டும் என்று சட்டமன்ற உறுப்பினர்கள் கருத்து தெரிவித்துள்ளனர்.
அந்த நடமாட்ட கட்டுப்பாட்டு ஆணை காலத்தில் மக்கள் நலன் காக்கக்கூடிய மாற்று திட்டங்களை அரசாங்கம் ஆராய வேண்டும் என்று டுசுன் துவா சட்டமன்ற உறுப்பினர் துவான் எர்டி பைசால் எடி யூசுப் கூறினார்.
அரசாங்கம் நடமாட்டக் கட்டுப்பாட்டு ஆணையை அமல் படுத்தினால் அதனை நாம் ஏற்றுத்தான் ஆக வேண்டும். எனினும், முழு அளவிலான நடமாட்டக் கட்டுப்பாட்டு ஆணையை அமல் செய்ய முடியாது. மக்களின் சமூக நலன் மீதும் இவ்விவகாரத்தில் கவனம் செலுத்த வேண்டும் என்றார் அவர்.
கடந்தாண்டில் அமல்படுத்தப்பட்டதைப் போல் முழு அளவிலான நடமாட்டக் கட்டுப்பாட்டு ஆணையை அமல் படுத்தும் திட்டத்தை தாம் வரவேற்பதாக செந்தோசா சட்டமன்ற உறுப்பினர் டாக்டர் குணராஜ் ஜோர்ஜ் கூறினார்.
அனைத்து வர்த்தக நடவடிக்கைகளை முடக்கவும் மக்களின் நடமாட்டத்தை கட்டுப்படுத்தவும் வகை செய்யும் முதல் கட்ட நடமாட்டக் கட்டுப்பாட்டு ஆணை போன்ற நடவடிக்கையை குறைந்தது இருவாரங்களுக்கு அல்லது ஒரு மாதத்திற்கு அமல்படுத்தப்படுவதற்கு நான் பரிந்துரைக்கிறேன். மக்களின் உயிர் முக்கியமானது. நடமாட்டக் கட்டுப்பாட்டு ஆணை முடிவுக்கு வந்தவுடன் பொருளாதாரத்தை மீட்சியுறச் செய்யலாம் என்றார் அவர்.
முழு அளவிலான நடமாட்டக் கட்டுப்பாட்டு ஆணை அமலாக்கத்தை ஏற்றுக் கொள்வது கடினமான ஒன்று எனக்கூறிய சிகிச்ஞ்சான் தொகுதி உறுப்பினர் இங் சுய் லிம், எனினும், நோய்த் தொற்றைக் குறைப்பதில் உதவும் என்றால் அதனை ஆதரித்து தான் ஆக வேண்டும் என்றார்.
