ஏர்ஏசியா நிறுவனத்திற்கு நிதியுதவி வழங்குவது குறித்த முன்மொழிவுகளை அமைச்சகங்கள் ஆராய்கின்றன

கோலாலம்பூர், அக். 28 — நிதி நெருக்கடியில் சிக்கியுள்ள ஏர் ஏசியா குழுமத்துக்கு நிதியுதவி வழங்குவது தொடர்பில் அரசு இதுவரை எந்தவொரு முடிவையும் எடுக்கவில்லை எனப் போக்குவரத்து அமைச்சர் அந்தோணி லோக் சியூ ஃபூக் தெரிவித்தார்.

ஏர் ஏசியாவுக்கு உதவுவதற்கான முன்மொழிவுகளைப் போக்குவரத்து அமைச்சும் நிதி அமைச்சும் தற்போது ஆய்வு செய்து வருவதாக அவர் கூறினார்.

பெரிய விமானச் சேவை நிறுவனம் ஒன்று திவாலாகும் நிலைக்குச் சென்றால், நாட்டின் விமானப் போக்குவரத்து இணைப்புகள் கடுமையாகப் பாதிக்கப்படக்கூடும். அதனால், விமானச் சேவைகள் தொடர்ந்து செயல்படுவதை உறுதிப்படுத்துவதே அரசாங்கத்தின் முதன்மையான நோக்கம் என அவர் குறிப்பிட்டார்.

“ஒரு விமான நிறுவனம் தனது சேவைகளை நிறுத்திக்கொண்டால், அது வேலைவாய்ப்புகளை இழக்கச் செய்வதுடன் மட்டுமல்லாமல், நாட்டின் விமானப் போக்குவரத்து இணைப்புகளையும் பாதிக்கும். இதனால் நாட்டுக்குப் பாதகமான விளைவுகள் ஏற்படக்கூடும்” என அந்தோணி தெரிவித்தார்.

2027ஆம் ஆண்டுக்கான வரவு செலவுத் திட்ட ஒதுக்கீட்டுச் தொடர்பான கொள்கைநிலை விவாதத்துக்குப் போக்குவரத்து அமைச்சின் சார்பில் பதிலளித்து, மக்களவையில் உரையாற்றியபோது அவர் இவ்வாறு கூறினார்.

ஏர் ஏசியா எதிர்கொண்டுள்ள அதிகப்படியான கடன் சுமை குறித்து பெரிக்காத்தான் நேஷனல் கூட்டணியின் ஜெராந்துட் நாடாளுமன்ற உறுப்பினர் கைரில் நிஜாம் கைருடின் எழுப்பிய கேள்விக்குப் பதிலளித்தபோது அமைச்சர் இதனைத் தெரிவித்தார்.

ஏர் ஏசியாவின் நிதி நிலைமை தொடர்பான முன்மொழிவுகள் இரு அமைச்சுகளாலும் தொடர்ந்து ஆராயப்பட்டு வரும் நிலையில், அந்நிறுவனத்துக்கு அரசு நிதியுதவி வழங்குமா என்பது குறித்த இறுதி முடிவு இன்னும் அறிவிக்கப்படவில்லை.