ஜோர்ஜ் டவுன், அக். 21 – மார்பகப் புற்றுநோயை ஆரம்பத்திலேயே கண்டறியும் நோக்கில் மலேசியாவில் செயல்படுத்தப்படும் மேமோகிராம் பரிசோதனை மானியத் திட்டத்தின் கீழ், அடுத்த ஆண்டு சுமார் 38,000 பெண்கள் பயனடைவார்கள் என எதிர்பார்க்கப்படுகிறது.
இதற்காக 2027-ஆம் ஆண்டு வரவு செலவுத் திட்டத்தில் அரசாங்கம் 9 மில்லியன் ரிங்கிட்டை ஒதுக்கியுள்ளது. இது நடப்பாண்டில் ஒதுக்கப்பட்ட 8 மில்லியன் ரிங்கிட்டைக் காட்டிலும் அதிகமாகும்.
பெண்கள், குடும்பம் மற்றும் சமூக மேம்பாட்டு அமைச்சர் டத்தோ ஸ்ரீ நான்சி சுக்ரி இதனைத் தெரிவித்தார்.
மலேசியப் பெண்கள் மேமோகிராம் பரிசோதனையை எளிதாகப் பெறுவதற்கான வாய்ப்பை உருவாக்க இத்திட்டம், 2007-ஆம் ஆண்டு அறிமுகப்படுத்தப்பட்டது.
இந்த மானியத் திட்டம் 40 முதல் 70 வயதுக்குட்பட்ட பெண்களை இலக்காகக் கொண்டுள்ளது. குடும்ப வருமானம் மாதம் 10,000 ரிங்கிட் அல்லது அதற்கும் குறைவாக உள்ள பெண்களுக்கு மேமோகிராம் பரிசோதனை முழுமையாக மானியத்தின் கீழ் வழங்கப்படும்.
அதேவேளையில், மாதக் குடும்ப வருமானம் 10,000 ரிங்கிட்டைத் தாண்டும் பெண்களும் திட்டத்தின் விதிமுறைகள் மற்றும் நிபந்தனைகளுக்கு உட்பட்டு 50 ரிங்கிட் மானியத்தைப் பெறுவதற்குப் பரிசீலிக்கப்படலாம் என நான்சி தெரிவித்தார்.
தற்போது நாடு முழுவதும் தேசிய மக்கள் தொகை மற்றும் குடும்ப மேம்பாட்டு வாரியமான எல்பிபிகேஎன் (LPPKN) அங்கீகரித்த 67 மேமோகிராம் பரிசோதனை மையங்களில் இத்திட்டம் தொடர்ந்து செயல்படுத்தப்பட்டு வருவதாக அவர் குறிப்பிட்டார்.
2026-ஆம் ஆண்டு செப்டம்பர் 30ஆம் தேதி நிலவரப்படி, இத்திட்டம் தொடங்கப்பட்டதிலிருந்து நாடு முழுவதும் மொத்தம் 5,95,143 பெண்கள் மேமோகிராம் பரிசோதனை மேற்கொண்டுள்ளனர். அவர்களில் 1,334 பேருக்கு மார்பகப் புற்றுநோய் இருப்பது உறுதிசெய்யப்பட்டுள்ளதாக அவர் தெரிவித்தார்.
பினாங்கு மாநிலத்தில் இதுவரை 54,549 பெண்கள் இந்தத் திட்டத்தின் கீழ் பரிசோதனை செய்துகொண்டுள்ளனர். அவர்களில் 93 பேருக்கு மார்பகப் புற்றுநோய் கண்டறியப்பட்டுள்ளது.
பினாங்கு வாட்டர்ஃபிரன்ட் மாநாட்டு மையத்தில் நடைபெற்ற 2026ஆம் ஆண்டுக்கான தேசிய மார்பகப் புற்றுநோய் விழிப்புணர்வு மாதத்தை முன்னிட்டு ஏற்பாடு செய்யப்பட்ட ‘பிங்க் கேர்’ (Pink CaRe) பிரசாரத்தைத் தொடக்கிவைத்து உரையாற்றியபோது நான்சி இத்தகவல்களை வெளியிட்டார்.
உலகப் புற்றுநோய் ஆய்வகத்தின் (Global Cancer Observatory – GLOBOCAN) 2022-ஆம் ஆண்டு தரவுகளின்படி, மலேசியப் பெண்களிடையே 8,371 புதிய மார்பகப் புற்றுநோய் சம்பவங்கள் பதிவாகியுள்ளன. அதே ஆண்டில் இந்நோயால் 3,526 பெண்கள் உயிரிழந்துள்ளனர்.
மேலும், 2023-ஆம் ஆண்டு தேசிய சுகாதாரம் மற்றும் நோயுற்ற நிலை குறித்த ஆய்வின் (NHMS) முடிவுகளின்படி, 40 வயதுக்கும் மேற்பட்ட பெண்களில் வெறும் 12.8 விழுக்காட்டினர் மட்டுமே அதற்கு முந்தைய மூன்று ஆண்டுகளில் மேமோகிராம் பரிசோதனை செய்துகொண்டுள்ளனர்.
இந்த விகிதம் 2019-ஆம் ஆண்டில் 21 விழுக்காடாக இருந்த நிலையில், 2023-ஆம் ஆண்டில் குறிப்பிடத்தக்க அளவில் குறைந்துள்ளது. இது பெண்களிடையே மார்பகப் புற்றுநோய் பரிசோதனையை ஊக்குவிப்பதற்கான விழிப்புணர்வு முயற்சிகளை மேலும் தீவிரப்படுத்த வேண்டியதன் அவசியத்தை எடுத்துக்காட்டுவதாகக் கருதப்படுகிறது.
ஒவ்வோர் ஆண்டும் அக்டோபர் மாதத்தில் உலகளவில் கடைப்பிடிக்கப்படும் மார்பகப் புற்றுநோய் விழிப்புணர்வு மாதம், இந்நோய் குறித்த புரிதலை மேம்படுத்துவதற்கும், ஆரம்பக் கட்டக் கண்டறிதலின் முக்கியத்துவத்தைப் பொதுமக்களிடம் எடுத்துரைப்பதற்கும் முக்கியமான தளமாக விளங்குவதாக நான்சி தெரிவித்தார்.
