ஜகார்த்தா, அக் 20 : காட்டுத்தீ மற்றும் நச்சுப் புகைமூட்டத்திற்கு எதிராக இந்தோனேசியாவின் பல நகரங்களில் செவ்வாய்க்கிழமை (அக்டோபர் 20) அன்று பொதுமக்கள் ஆர்ப்பாட்டத்தில் ஈடுபட்டனர்.
அதிபர் பிரபோவோ சுபியாந்தோ பதவியேற்று ஈராண்டுகள் நிறைவடைந்ததையொட்டி, அரசாங்கத்தின் செயலற்ற தன்மை மற்றும் ஊழலுக்கு எதிராகத் தங்களின் அதிருப்தியை வெளிப்படுத்த பல்கலைக்கழக மாணவர்கள் இந்த ஆர்ப்பாட்டத்திற்கு அழைப்பு விடுத்திருந்தனர்.
தலைநகர் ஜகார்த்தா மட்டுமின்றி பான்டுங், யோக்யகார்த்தா, சுமத்ராவின் பெக்கான்பாரு மற்றும் தெற்கு சுலவேசியின் மக்காசர் ஆகிய நகரங்களிலும் போராட்டங்கள் வெடித்தன.
ஜூலை மாதம் முதல் போர்னியோ மற்றும் சுமத்ரா தீவுகளின் பரந்த பகுதிகளை அழித்து வரும் காட்டுத்தீயை அணைக்க அரசாங்கத்தால் இயலவில்லை என்பதை ஆர்ப்பாட்டக்காரர்கள் முக்கியமாக சுட்டிக்காட்டினர்.
"நாங்கள் எரிந்தால், நீங்களும் எங்களுடன் எரிவீர்கள்!" மற்றும் "எனக்கு சுவாசிக்கும் உரிமை உண்டு, உடனடியாகத் தீயை அணையுங்கள்" போன்ற வாசகங்கள் அடங்கிய பதாகைகளை ஏந்திப் பொதுமக்கள் போராடினர்.
புகைமூட்டம் மிக மோசமாக இருப்பதால் வியாபாரம் முடங்கியுள்ளதாகவும், விலையேற்றம் அதிகரித்து வரும் சூழலில் வருமானம் ஏதுமில்லை என்றும் எளிய மக்கள் தங்களது வேதனையைப் பகிர்ந்து கொண்டனர்.
பல குடும்பங்களில் குழந்தைகள் மற்றும் பெரியவர்கள் வீடுகளுக்குள் புகை புகுந்ததால் ஒரு மாத காலமாகத் தொடர் இருமல், சளி மற்றும் உடல்வலியால் அவதிப்பட்டு வருவதாகக் கூறினர்.
நுசந்தாரா அட்லஸ் (Nusantara Atlas) காட்டுத்தீ கண்காணிப்பு அமைப்பின்படி, 2026 ஆண்டின் முதல் ஒன்பது மாதங்களில் மட்டும் இந்தோனேசியாவின் காட்டுத்தீயால் 19 லட்சம் ஹெக்டேருக்கும் அதிகமான நிலங்கள் எரிந்து சாம்பலாகியுள்ளன.
இந்தத் தீயினால் ஏற்பட்டுள்ள காற்று மாசுபாடு மலேசியாவின் கோலாலம்பூர் மற்றும் சிங்கப்பூர் வரை பரவிப் பாதிப்பை ஏற்படுத்தி வருகிறது.
இந்தோனேசியாவில் ஒவ்வொரு வறண்ட காலத்திலும் காட்டுத்தீ ஏற்படுவது வழக்கம் என்றாலும், எல் நினோ வானிலை மாற்றத்தின் தீவிர தாக்கத்தின் காரணமாக இவ்வாண்டு தீ விபத்துகள் மிகக் கடுமையான ஒன்றாக மாறியுள்ளன.
