ஷா ஆலாம், ஆகஸ்ட் 13 - சம்பந்தப்பட்ட தொழில்துறைக்குத் தேவையான நீர், மின்சார விநியோக வசதிகள் இல்லாத பகுதிகளில் புதிய தரவு மையங்களை (Data Centres) அமைப்பதற்கு சிலாங்கூர் மாநில அரசு அனுமதி வழங்காது.
சிலாங்கூர் மாநிலத்திற்குள் தரவு மையத் தொழிற்துறையை அனுமதிப்பதற்கு அதுவே மாநில அரசின் தெளிவான கொள்கையாகும் என மந்திரி பெசார் டத்தோ ஸ்ரீ அமிருதின் ஷாரி தெரிவித்தார்.
தரவு மையங்கள் தன்னிச்சையாகக் கட்டப்படுவதில்லை என்றும், அவற்றுக்குத் தேவையான போதிய நீர் மற்றும் மின்சார விநியோகம் கட்டாயம் இருக்க வேண்டும் என்றும் அவர் கூறினார்.
சமீபகாலமாக குறிப்பிட்ட தரவு மையங்கள் மாநிலத்திற்குள் நுழைந்திருந்தாலும், நீர் விநியோகம் இல்லாத பட்சத்தில் அவற்றுக்குத் தங்களால் அனுமதி வழங்க முடியாது என்பதை அவர் தெளிவுபடுத்தினார்.
எங்களிடம் தண்ணீர் இல்லை என்றால் தரவு மையங்கள் உள்ளே வர அனுமதிக்க மாட்டோம் என்பதும், அவர்கள் வேறு இடங்களைத் தேடிப் பார்த்துக் கொள்ளலாம் என்பதும் தங்களின் மிகத் தெளிவான கொள்கை என்று சிலாங்கூர் மாநில சட்டமன்றக் கூட்டத்தின் நிறைவுரையின் போது அவர் குறிப்பிட்டார்.
லபோஹான் டகாங் இரண்டாம் கட்டம் மற்றும் லங்காட் 2 நீர் அணைக்கட்டின் இரண்டாம் கட்ட விரிவாக்கம் உள்ளிட்ட உட்கட்டமைப்பு விரிவாக்கத் திட்டங்களின் மூலம் சிலாங்கூர் மாநிலம் வலுவான நீர் விநியோக இருப்பு வரம்பைக் கொண்டுள்ளது என்று அமிருதின் மேலும் கூறினார்.
முன்னரே குறிப்பிட்டபடி, மாநிலத்தின் நீர் இருப்பு வரம்பு மிகச் சிறந்த முறையில் கட்டுப்படுத்தப்பட்டுள்ளது என்றும், ரசாவ் ( Rasau ) திட்டப்பணிகள் முழுமையாக நிறைவடைந்தவுடன் இந்த இருப்பு வரம்பு 18 சதவீதத்தை எட்டும் என்றும் அவர் விவரித்தார்.
இதற்கிடையில், தரவு மையங்களுக்குத் தேவையான சேவைகளை வழங்க உள்ளூர் நிறுவனங்களுக்கு வாய்ப்புகளை வழங்குவதற்காக 30 சதவீத உள்ளூர் கொள்கையை மாநில அரசு அறிமுகப்படுத்தவுள்ளது.
தகுதியான உள்ளூர் நிறுவனங்கள் போதுமான எண்ணிக்கையில் இருப்பதை உறுதி செய்வதற்கும், தரவு மையத் துறையின் திறன் பாதிக்கப்படாமல் இருப்பதற்கும், தொடக்கக் கட்டத்தில் இந்த வாய்ப்பு சிலாங்கூர் மாநிலத்தை மட்டுமே தளமாகக் கொண்ட நிறுவனங்களுக்கு மட்டுமே வழங்கப்படாது.
தொடக்கத்தில் தாங்கள் இதைச் சிலாங்கூர் நிறுவனங்களுக்கு மட்டும் ஒதுக்கப் போவதில்லை என்றும், முதலில் மலேசிய உள்ளூர் நிறுவனங்களைப் பயன்படுத்துவோம் என்றும் அவர் கூறினார்.
ஏனெனில், இதைச் சிலாங்கூர் மாநிலத்திற்குள் மட்டுமே கட்டுப்படுத்தினால் நிறுவனங்களின் எண்ணிக்கை மிகவும் வரம்புக்குட்பட்டதாக மாறி, அது தரவு மையங்களின் தொடர்ச்சியான செயல்பாட்டுத் திறனுக்கு அழுத்தத்தை ஏற்படுத்தக்கூடும் என்று அவர் விளக்கினார்.
செர்ரி (Cherry) நிறுவனத்தை ஒரு சிறந்த உதாரணமாகக் குறிப்பிட்ட மந்திரி பெசார், அந்த நிறுவனம் 2,500 ரிங்கிட் முதல் 16,000 ரிங்கிட் வரையிலான சம்பளத்தில் 100 உள்ளூர் தொழிலாளர்களுக்கு வேலை வாய்ப்புகளை வழங்கியுள்ளது என்றார்.
மேலும், 300 உள்ளூர் நிறுவனங்கள் அந்த செர்ரி நிறுவனத்துடன் 1.2 பில்லியன் ரிங்கிட் மதிப்பிலான ஒப்பந்தங்களைப் பெற்றுள்ளதாகத் தங்களிடம் தெரிவித்துள்ளதாகவும் அமிருதின் சுட்டிக்காட்டினார்.
