பெட்டாலிங் ஜெயா, ஆகஸ்ட் 12 : 12.5 கிலோகிராம் எடையும், 60 சென்டிமீட்டர் உயரமும் கொண்ட, டத்தோ ஸ்ரீ டாக்டர் லீ சோங் வெய்யின் உருவம் பொறிக்கப்பட்ட தங்க முலாம் பூசப்பட்ட சிறப்புக் கிண்ணம், முதலாவது லீ சோங் வெய் கிண்ண பூப்பந்து வெற்றியாளர் போட்டியில் வெல்வோருக்கு வழங்கப்படவுள்ளது.
இப்போட்டிகள் ஆகஸ்ட் 29 முதல் செப்டம்பர் 6 வரை நடைபெறவுள்ளன.
பிரீமியம் தரத்திலான பித்தளையால் முழுமையாகக் கையால் செய்யப்பட்டு, தங்க முலாம் பூசப்பட்டு, உறுதியான தேக்கு மர அடிப்பகுதியைக் கொண்ட இந்த சவால் கிண்ணம், நேற்று நடைபெற்ற எளிமையான ஆனால் அர்த்தமுள்ள விழாவில் அறிமுகப்படுத்தப்பட்டது.
"சிறப்பை நோக்கிய பயணம் & வெற்றியாளர்களை ஊக்குவித்தல்" என்ற கருப்பொருளைக் கொண்ட இதன் வடிவமைப்பு, லீ சோங் வெய்யின் வாழ்க்கைப் பயணம் மற்றும் அவரது மன உறுதி, ஒழுக்கம், பணிவு மற்றும் பின்னடைவிலிருந்து மீளும் திறன் ஆகிய மதிப்புகளால் ஈர்க்கப்பட்டு உருவாக்கப்பட்டுள்ளது.
சோங் வெய்யின் உருவத்துடன் சேர்த்து, இந்த கிண்ணத்தின் வளைந்த வடிவமைப்பு வேகம் மற்றும் சகிப்புத்தன்மையைக் குறிக்கிறது.
அதே நேரத்தில் பூப்பந்து ராக்கெட் மற்றும் வலை வடிவங்கள் துல்லியம், தொழில்நுட்பத் தேர்ச்சி மற்றும் கவனத்தை வெளிப்படுத்துகின்றன.
மேல்நோக்கிப் பார்க்கும் முப்பரிமாண இறகுப்பந்து இளம் வீரர்கள் இந்த விளையாட்டில் மிக உயர்ந்த நிலையை அடைய வேண்டும் என்ற லட்சியத்தை அடையாளப்படுத்தி, இந்த கிண்ணத்தின் தனித்துவமான வடிவமைப்பை முழுமையாக்குகிறது.
LCWC அமைப்பின் நிறுவனருமான சோங் வெய், புதிய தலைமுறைக்கான மலேசிய பூப்பந்து வீரர்களை வளர்த்தெடுத்து அவர்களை அடுத்த கட்டத்திற்கு கொண்டு செல்வதற்கான தனது முயற்சிகளின் ஒரு பகுதியாகவே இந்த போட்டியை ஏற்பாடு செய்துள்ளதாகக் கூறினார்.
"இந்தக் கோப்பை எனது கனவு, அதே போல் எனது ஆர்வம். மலேசியாவின் இளம் தலைமுறையினரை மேம்படுத்தி அவர்களை வேறு ஒரு நிலைக்கு கொண்டு செல்ல நான் விரும்புகிறேன்.இது நாட்டிற்கும் சங்கத்திற்கும் நான் செய்யும் கைமாறு ஆகும்.
நான் தேசிய அணியுடன் 19 ஆண்டுகள் கழித்தேன், எனவே நான் திரும்ப ஏதேனும் பங்களிப்பை வழங்கி அடுத்த தலைமுறையை உருவாக்க உதவ விரும்புகிறேன்," என்று லீ சோங் வெய் கிண்ணத்தின் அறிமுகத்திற்கான செய்தியாளர் சந்திப்பில் சோங் வெய் கூறினார்.
இந்த LCWC போட்டியில் 13 வயதுக்குட்பட்டோர், 15 வயதுக்குட்பட்டோர் மற்றும் 17 வயதுக்குட்பட்டோர் ஆகிய பிரிவுகளில் சிறுவர் மற்றும் சிறுமியர் ஒற்றையர், சிறுவர் மற்றும் சிறுமியர் இரட்டையர், அத்துடன் கலப்பு இரட்டையர் போட்டிகள் இடம் பெற்றுள்ளன.
மொத்தம் RM100,000 பரிசுத் தொகை வழங்கப்படவுள்ளது.
மலேசியாவில் ஜூனியர் பேட்மிண்டன் போட்டிக்கு வழங்கப்படும் மிக உயர்ந்த பரிசுத் தொகை இதுவாகும் என்று ஏற்பாட்டாளர்கள் தெரிவித்தனர்.
