கோலாலம்பூர், ஆகஸ்ட் 9: சிலாங்கூர், சுங்கை பூலோ பகுதியில் பெண் ஒருவரின் வீட்டுக்குள் புகுந்து கொள்ளையடித்ததாக சந்தேகிக்கப்படும் நான்கு ஆடவர்களை போலீசார் தீவிரமாகத் தேடி வருகின்றனர்.
இந்தச் சம்பவத்தில் சுமார் 35 ஆயிரம் ரிங்கிட் மதிப்பிலான பொருட்கள் மற்றும் ஆவணங்கள் காணாமல் போயுள்ளதாகத் தெரிவிக்கப்பட்டுள்ளது.
சுங்கை பூலோ மாவட்ட போலீஸ் தலைவர் சுப்ரிடெண்டன் முகமட் ஹபீஸ் முகமட் நோர் கூறுகையில், இச்சம்பவம் தொடர்பாகப் போலீசாருக்கு புகார் கிடைத்ததாகவும், அதனைத் தொடர்ந்து விசாரணைகள் முன்னெடுக்கப்பட்டு வருவதாகவும் தெரிவித்தார்.
முதற்கட்ட விசாரணைகளின் அடிப்படையில், முகமூடி அணிந்திருந்த நான்கு ஆடவர்கள் வீட்டுக்குள் புகுந்து கொள்ளைச் சம்பவத்தில் ஈடுபட்டிருக்கலாம் என நம்பப்படுவதாக அவர் கூறினார்.
இந்தச் சம்பவத்தில் வீட்டிலிருந்த நகைகள் உள்ளிட்ட பெறுமதியான பொருட்கள் கொள்ளையடிக்கப்பட்டதுடன், சில முக்கியமான ஆவணங்களும் காணாமல் போயுள்ளதாக அவர் தெரிவித்தார்.
இச்சம்பவம் தொடர்பாக குற்றவியல் சட்டத்தின் 457ஆவது பிரிவின் கீழ் விசாரணை நடத்தப்பட்டு வருவதாக முகமட் ஹபீஸ் தெரிவித்தார்.
இதனிடையே, சம்பவம் தொடர்பான காணொளி ஒன்று சமூக ஊடகங்களில் பரவி வருகிறது. அதில், பெண்ணின் வீடு உடைக்கப்பட்ட பின்னர் வீட்டின் உட்பகுதி பொருட்கள் சிதறிக் கிடக்கும் காட்சிகள் இடம்பெற்றுள்ளன.
சம்பவத்தின்போது வீட்டிலிருந்த பணம், கையடக்கத் தொலைபேசி, நகைகள் மற்றும் கடவுப்பிதழ் உள்ளிட்ட முக்கியமான பொருட்கள் காணாமல் போயுள்ளதாகவும் சமூக ஊடகங்களில் தகவல்கள் பரவி வருகின்றன.
எனினும், இந்தத் தகவல்கள் தொடர்பான மேல் விசாரணைகள் தொடர்ந்து நடைபெற்று வருவதாக போலீசார் தெரிவித்துள்ளனர்.
இச்சம்பவம் குறித்து ஏதேனும் தகவல் தெரிந்த பொதுமக்கள், விசாரணை அதிகாரியான சார்ஜன் ஷாமி யூசோப்பை 013-6463069 என்ற தொலைபேசி எண்ணிலும் அல்லது சுங்கை பூலோ மாவட்ட போலீஸ் தலைமையகத்தை 03-61561222 என்ற எண்ணிலும் தொடர்புகொண்டு தகவல் வழங்குமாறு கேட்டுக்கொள்ளப்பட்டுள்ளனர்.
