கோலாலம்பூர்,ஆகஸ்ட் 3 : டிஏபி (DAP) கட்சியின் பொதுச் செயலாளர் அந்தோணி லோக், நெகிரி செம்பிலான் மாநில டிஏபி தலைவர் பதவியிலிருந்து விலகுவதாக நேற்று ( திங்கள்) அறிவித்தார்.
அண்மையில் நடந்து முடிந்த 16-ஆவது நெகிரி செம்பிலான் மாநிலத் தேர்தலில், தாம் போட்டியிட்ட சென்னா (Chennah) சட்டமன்றத் தொகுதியைத் தற்காத்துக் கொள்ளத் தவறியதைத் தொடர்ந்து அவர் அந்த முடிவை எடுத்துள்ளார்.
கடந்த 22 ஆண்டுகளாக அப்பதவியை வகித்து வந்த நிலையில், தார்மீகப் பொறுப்பேற்று அந்த முடிவை எடுத்துள்ளதாக போக்குவரத்து அமைச்சருமான லோக் கூறினார்.
"மாநிலத் தலைவர் பதவியிலிருந்து நான் விலகி, புதிய மாநிலத் தலைவரைத் தேர்ந்தெடுக்கும் பொறுப்பை மாநிலத் தலைமைத்துவத்திடமோ அல்லது நெகிரி செம்பிலான் மாநில டிஏபி குழுவிடமோ ஒப்படைப்பதற்கான நேரம் வந்துவிட்டது என்று நான் உணர்கிறேன்.
தற்போதுள்ள குழு உறுப்பினர்களில் ஒருவரை புதிய தலைவராக அவர்கள் தேர்ந்தெடுக்கலாம்," என்று அவர் கூறினார்.
இதனிடையே, மாநிலத் தலைவர் பதவியைத் துறக்கும் முடிவு எந்தவொரு தரப்பின் அழுத்தமும் இன்றி, தனது சொந்த விருப்பத்தின் பேரில் எடுக்கப்பட்டது என்றும் அவர் தெளிவுபடுத்தினார்.
அதே வேளையில், டிஏபி பொதுச் செயலாளராகத் தனது கடமைகளைத் தொடர்ந்து செய்யவிருப்பதாக லோக் தெரிவித்தார்.
வரும் 16-ஆவது பொதுத் தேர்தலின் சவால்களை எதிர்கொள்ளும் வகையில், சிரம்பான் நாடாளுமன்ற உறுப்பினரான அவரே தொடர்ந்து கட்சியை வழிநடத்த வேண்டும் என்று மத்திய செயற்குழு ஏகமனதாக ஒப்புக்கொண்டதாக அவர் குறிப்பிட்டார்.
நேற்று இரவு டிஏபி தலைமையகத்தில் நடைபெற்ற மத்திய செயற்குழு கூட்டத்திற்குத் தலைமை தாங்கிய பின்னர் செய்தியாளர்களிடம் பேசியபோது அவர் இதனைத் தெரிவித்தார்.
அக்கூட்டத்தில் டிஏபி தேசியத் தலைவர் கோவிந்த் சிங் தியோ, துணைப் பொதுச் செயலாளர் ஹன்னா இயோ மற்றும் கட்சியின் உயர்மட்டத் தலைவர்கள் பலரும் கலந்துகொண்டனர்.
