கோலாலம்பூர், ஜூன் 26: வெனிசுலாவில் ஏற்பட்ட 7.5 ரிக்டர் அளவிலான சக்திவாய்ந்த நிலநடுக்கத்தைத் தொடர்ந்து, அங்கு பதிவு செய்துள்ள மலேசியர்கள் அனைவரும் பாதுகாப்பாக உள்ளனர் என்பதை விஸ்மா புத்ரா (மலேசிய வெளியுறவு அமைச்சு) உறுதிப்படுத்தியுள்ளது.
இந்த பேரிடரால் பாதிக்கப்பட்ட அனைத்து தரப்பினருக்கும் மலேசிய வெளியுறவு அமைச்சு தனது ஆழ்ந்த அனுதாபங்களைத் தெரிவித்துக் கொண்டுள்ளதுடன், காரகாஸில் உள்ள மலேசிய தூதரகம் அங்குள்ள மலேசியர்களின் பாதுகாப்பு நிலவரத்தை அதிகாரப்பூர்வமாக உறுதிப்படுத்தியுள்ளதாகவும் குறிப்பிட்டுள்ளது.
தற்போதைய நிலையில், நிலநடுக்கத்தால் ஏற்பட்டுள்ள உயிர்ச்சேதங்கள் மற்றும் முழுமையான பாதிப்புகள் குறித்து வெனிசுலா நாட்டு அதிகாரிகள் இன்னும் மதிப்பீடு செய்து வருகின்றனர்.
பாதிக்கப்பட்ட பகுதிகளில் வசிக்கும் அல்லது அங்கு பயணம் மேற்கொண்டுள்ள மலேசியர்கள் அனைவரும் தகுந்த பாதுகாப்பு முன்னெச்சரிக்கை நடவடிக்கைகளை எடுக்குமாறும், உள்ளூர் பாதுகாப்பு அதிகாரிகளின் அறிவுறுத்தல்களை முழுமையாகப் பின்பற்றுமாறும் அறிவுறுத்தப்படுகிறார்கள்.
இதுவரை தூதரகத்தில் தங்களைப் பதிவு செய்யாத மலேசியர்கள், இ-கான்சுலர் (e-Konsular) இணையப் பக்கத்தின் வழி உடனடியாகப் பதிவு செய்துகொள்ளுமாறு வலியுறுத்தப்படுகிறார்கள்.
