ஷா ஆலம், ஜூன் 18: நாட்டில் அதிகரித்து வரும் இரத்தத் தேவையைப் பூர்த்தி செய்யவும், தேசிய இரத்தக் கையிருப்பை எப்போதும் சீராக வைத்திருக்கவும், நாட்டின் மொத்த மக்கள் தொகையில் குறைந்தது மூன்று சதவீதத்தினராவது இரத்தம் தானம் செய்வதை தேசிய இரத்த மையம் இலக்காகக் கொண்டுள்ளது.
தற்போது மலேசியாவின் இரத்த தான விகிதம் 2.3 சதவீதமாக மட்டுமே உள்ளது, அதாவது ஒவ்வொரு 1,000 மக்களுக்கும் 23 பேர் மட்டுமே இரத்தம் தானம் செய்கிறார்கள் என்று தேசிய இரத்த மையத்தின் துணை இயக்குனர் டாக்டர் துன் மைசூரா முகமட் ஃபத்துல்லா தெரிவித்துள்ளார்.
நாட்டின் இந்த விகிதாச்சாரத்தை குறைந்தது 3 சதவீதமாக அல்லது ஒவ்வொரு 1,000 பேருக்கும் 30 நன்கொடையாளர்கள் என்ற நிலைக்கு உயர்த்த வேண்டியது அவசியமாகும்.
மலேசியாவில் தலாசீமியா நோயாளிகள், அறுவை சிகிச்சை செய்துகொள்பவர்கள், பிரசவ காலப் பெண்கள் மற்றும் விபத்துகளில் சிக்குபவர்களுக்கு அவசரகால இரத்த விநியோகத்தை தடையின்றி வழங்குவதற்கு இந்த உயர்வு மிக முக்கியமானது என்று அவர் சுட்டிக்காட்டினார்.
ஷா ஆலம், மாரா தொழில்நுட்ப பல்கலைக்கழகத்தில் (UiTM) நடைபெற்ற 'UiTM சாக்னா' பெருந்திட்ட இரத்த தான முகாமில், 2,250 இரத்தப் பைகளை அதிகாரப்பூர்வமாகப் பெற்றுக்கொண்ட பின்னர் அவர் இந்த விவரங்களை வெளியிட்டார்.
தற்போதைய சூழலில் தேசிய இரத்த மையத்தில் இரத்தக் கையிருப்பு போதுமான அளவில் இருந்தாலும், சேகரிக்கப்படும் இரத்தக் கூறுகளின் ஆயுட்காலம் மிகக் குறைவு என்பதால், தொடர்ச்சியாக இரத்தம் தானம் பெறும் முகாம்களை நடத்துவது கட்டாயமாகிறது.
குறிப்பாக, 'பிளேட்லெட்ஸ்' (Platelets) ஐந்து நாட்களுக்கு மட்டுமே சேமிக்கப்பட முடியும் என்றும், சிவப்பு இரத்த அணுக்களை 35 முதல் 42 நாட்கள் வரை மட்டுமே வைத்திருக்க முடியும் என்றும் அவர் விளக்கமளித்தார்.
அதுமட்டுமன்றி, தற்போது தொடர்ந்து இரத்தம் தானம் செய்து வரும் நபர்கள் 70 வயதான தங்களின் அதிகபட்ச வயது வரம்பை எட்டவுள்ளதால், அவர்களுக்குப் பதிலாக புதிய இளம் நன்கொடையாளர்களைக் கண்டறியும் முயற்சிகள் தீவிரப்படுத்தப்பட வேண்டும் என்றும் அவர் கேட்டுக்கொண்டார்.
நாட்டில் புதிய அரசு மருத்துவமனைகளின் எண்ணிக்கை அதிகரித்து வருவதால், அதற்கேற்ப மருத்துவப் பணிச்சுமையும் இரத்தத்திற்கான தேவையும் பலமடங்கு உயர்ந்துள்ளது. எனவே, பொதுமக்கள் ஏதேனும் அவசரநிலை அல்லது தட்டுப்பாடு ஏற்படும் போது மட்டும் வராமல், ஒவ்வொரு மூன்று மாதங்களுக்கும் ஒருமுறை வழக்கமாக இரத்தம் தானம் செய்ய முன்வர வேண்டும் என அவர் ஊக்கப்படுத்தினார்.
இதனிடையே, மலேசியர்களில் கிட்டத்தட்ட 50 சதவீதத்தினர் 'O' பிரிவு இரத்தத்தைக் கொண்டிருப்பதால், அந்தப் பிரிவிற்கான தேவையைச் சமநிலைப்படுத்த அனைத்து இரத்தப் பிரிவுகளின் கையிருப்பையும் தேசிய இரத்த மையம் உன்னிப்பாகக் கண்காணித்து வருவதாகவும் அவர் கூறினார்.
சுகாதார அமைச்சரின் அரசியல் செயலாளர் முகமட் ஃபைசல் இஸ்மாயில் மற்றும் UiTM ஆராய்ச்சி மற்றும் கண்டுபிடிப்புத் துறை துணைவேந்தர் பேராசிரியர் டாக்டர் நொராசா அப்துல் ரஹ்மான் ஆகியோரால் அதிகாரப்பூர்வமாகத் தொடக்கி வைக்கப்பட்ட இந்த 'UiTM சாக்னா' இரத்த தான முகாம், காலை 10 மணி முதல் மாலை 5 மணி வரை விறுவிறுப்பாக நடைபெற்றது.
நாடு முழுவதும் உள்ள 21 UiTM வளாகங்களின் பேராசிரியர்கள் மற்றும் மாணவர்களை உள்ளடக்கிய இந்த மாபெரும் முகாம், மலேசியாவின் இரத்த விநியோகத்தை உறுதி செய்வதில், குறிப்பாக தினசரி 600 முதல் 700 பைகள் இரத்தம் தேவைப்படும் கிள்ளான் பள்ளத்தாக்கு (Lembah Klang) பகுதிக்கு ஒரு முக்கியப் பக்கபலமாக அமைந்துள்ளது.
