கோலா லங்காட், ஜூன் 13: இந்த மாதம் முதல் நாட்டில் எல் நினோ (El Nino) தொடங்கவிருப்பதைக் கருத்தில் கொண்டு, குறைந்த மழைப்பொழிவு மற்றும் வறண்ட வானிலையிலும் சிலாங்கூர் மாநிலத்தில் தடையற்ற மற்றும் சீரான நீர் விநியோகத்தை உறுதி செய்வதற்கான ஆயத்தப் பணிகளை மாநில அரசு தீவிரப்படுத்தியுள்ளது.
சிலாங்கூர் நீர் மேலாண்மை வாரியம் (LUAS) மற்றும் சம்பந்தப்பட்ட முகமைகளின் வாயிலாகப் பல முக்கிய முன்னெச்சரிக்கை நடவடிக்கைகள் ஏற்கனவே முடுக்கி விடப்பட்டுள்ளதாக மாநில மந்திரி புசார் டத்தோஸ்ரீ அமிருடின் ஷாரி தெரிவித்துள்ளார்.
இதன் ஒரு பகுதியாக, 1999ஆம் ஆண்டு லுவாஸ் அவசரச் சட்டத்தின் 41ஆவது பிரிவுக்கு இணங்க, அணைகளிலிருந்து நீர் திறந்து விடப்படுவதைக் கட்டுப்படுத்தும் முறையான வழிமுறைகள் அமல்படுத்தப்பட்டுள்ளன.
இன்று பந்தாய் கெலானாங்கில் (Pantai Kelanang) நடைபெற்ற சிலாங்கூர் உலக நீர் தினம் மற்றும் குறைந்த கார்பன் தினக் கொண்டாட்டத்தில், மாநில சுற்றுச்சூழல் துறை நிர்வாகக் குழு உறுப்பினர் (EXCO) ஜமாலியா ஜமாலுடினால் வாசிக்கப்பட்ட மந்திரி புசாரின் உரையில் இத்தகவல்கள் குறிப்பிடப்பட்டுள்ளன.
அணைக்கட்டுகளின் நீர்மட்டம் மற்றும் அதன் கொள்ளளவை லுவாஸ் அமைப்பின் 'ஒருங்கிணைந்த நீர் வளம் மற்றும் தகவல் மேலாண்மை அமைப்பு' (IWRIMS) மூலமாகத் தினசரி கண்காணிப்பதுடன், மாற்று நீர் ஆதாரமாக 'சிலாங்கூர் ஆற்றுக்கு வெளியேயான நீர்ச் சேமிப்புத் திட்டம்' (SORSS) உருவாக்கப்பட்டுச் செயல்படுத்தப்பட்டு வருவதாக அவர் கூறினார்.
மேலும், நிலத்தடி நீர் பயன்பாட்டை உகந்ததாக்குதல், நீரின் தரத்தைக் கட்டுப்படுத்த 'பூஜ்ஜியக் கழிவு வெளியேற்றக் கொள்கையை' (ZDP) அமல்படுத்துதல் மற்றும் நீர் மாசுபடுவதற்கான மூலக் காரணங்களைத் தடுத்தல் போன்ற நடவடிக்கைகளும் மேற்கொள்ளப்பட்டு வருகின்றன.
லுவாஸ் அமைப்பின் பிரத்தியேக 'எலைட் நீர் படை' (Elite Water Squad) மூலமாக 24 மணி நேரத் தொடர் கண்காணிப்பு மற்றும் தணிப்பு நடவடிக்கைகள் எடுக்கப்பட்டு வருவதோடு, 'தூய்மையற்ற நீர் உத்தரவாதத் திட்டம்' (SJAM) வாயிலாகவும் பணிகள் தொய்வின்றி நடந்து வருவதாக அவர் விவரித்தார்.
நீரின் அளவை மட்டுமின்றி அதன் தரத்தையும் உறுதி செய்வதன் மூலமே, நீர் சுத்திகரிப்பு நிலையங்கள் (WTP) மூலமாகப் பொதுமக்களுக்குத் தூய்மையான நீரை விநியோகிக்க முடியும் என்பதில் மாநில அரசு உறுதியாக உள்ளது.
நீர் சுத்திகரிப்பு நிலையங்களின் செயல்பாடுகளைப் பாதிக்கக்கூடிய நீர் மாசுபாடுகளுக்கு எதிரான தடுப்பு நடவடிக்கைகளை வலுப்படுத்துவதன் மூலம், நீர் ஆதாரங்களின் நிலைத்தன்மையை உறுதி செய்ய மாநில அரசு தொடர்ந்து பாடுபடும் என்று மந்திரி புசார் தனது உரையில் வலியுறுத்தினார்.
மேம்பாட்டுப் பணிகள், வணிகம் மற்றும் தொழில்துறை நடவடிக்கைகளிலிருந்து வெளியேறும் கழிவுநீர்ப் புள்ளிகளைக் கண்டறிந்து, சம்பந்தப்பட்ட முகமைகளுடன் இணைந்து கூட்டு நடவடிக்கை எடுப்பதற்காகக், கடந்த 2023ஆம் ஆண்டு லுவாஸ் அமைப்பால் 'ஆற்று கண்காணிப்புத் திட்டம்' (River Monitoring Programme) அறிமுகப்படுத்தப்பட்டது.
அதன் தொடர்ச்சியாக, முன்னதாகப் பயன்படுத்தப்பட்ட ட்ரோன் (Drone) கண்காணிப்பு முறைகளை விட இன்னும் மேம்பட்ட தொழில்நுட்பமாக, கடந்த 2024 ஆகஸ்ட் மாதம் லுவாஸ் மற்றும் மலேசிய விண்வெளி முகமைக்கு (MYSA) இடையே கையெழுத்தான புரிந்துணர்வு ஒப்பந்தத்தின் மூலம் 'சிலாங்கூர் புவி மேற்பரப்பு நடவடிக்கை கண்காணிப்பு அமைப்பு' உருவாக்கப்பட்டது.
செயற்கைக்கோள் தொழில்நுட்பத்தைப் பயன்படுத்தி மாநிலத்தின் நீர் ஆதாரங்களைக் கண்காணிக்கும் இந்த அமைப்பானது, நீர்நிலைகளைப் பாதிக்கும் நிலப் பயன்பாட்டு நடவடிக்கைகளைக் கண்காணிக்கவும், மாசு மூலங்களை முன்கூட்டியே கண்டறியவும், அமலாக்கத்தை வலுப்படுத்தவும் லுவாஸ் அதிகாரிகளுக்குப் பெரிதும் துணையாக இருக்கும் என்று அவர் விவரித்தார்.
கணிக்க முடியாத தீவிர வானிலையை எதிர்கொள்ள அடித்தள மட்டத்திலான ஏற்பாடுகள் வலுப்படுத்தப்பட வேண்டும் என்று பிரதமர் டத்தோஸ்ரீ அன்வார் இப்ராஹிம் அண்மையில் வலியுறுத்தியிருந்தது என்பது குறிப்பிடத்தக்கது.
