பெட்டாலிங் ஜெயா, ஜூன் 13: பெட்டாலிங் ஜெயா மாநகராட்சி பகுதியில் முதியோர்களின் எண்ணிக்கை தொடர்ந்து அதிகரித்து வருகிறது.
அதனைக் கருத்தில் கொண்டு, அவர்களுக்கு உகந்த ஒரு நகரை உருவாக்குவதற்காகத் தங்களின் கொள்கைகள், உள்கட்டமைப்பு மற்றும் திட்டமிடல் ஆகியவற்றை பெட்டாலிங் ஜெயா மாநகராட்சி (MBPJ) மேம்படுத்தி வருவதாக அதன் மேயர் டத்தோ முகமட் ஜஹ்ரி சாமிங்கோன் தெரிவித்துள்ளார்.
தற்போதைய நிலவரப்படி, பெட்டாலிங் ஜெயாவின் மொத்த மக்கள் தொகையில் சுமார் 12 விழுக்காட்டினர், அதாவது ஏறக்குறைய 80,000 குடியிருப்பாளர்கள் முதியோர்கள் ஆவர். இதனால், அவர்களின் அன்றாடத் தேவைகளைப் பூர்த்தி செய்யும் வகையில் பொது வசதிகளையும் சேவைகளையும் தரம் உயர்த்த வேண்டியது மாநகராட்சிக்கு மிக அவசியமான ஒன்றாக மாறியுள்ளது என்று அவர் குறிப்பிட்டார்.
நேற்று இரவு பெட்டாலிங் ஜெயா மாநகராட்சி நகர்புற மண்டபத்தில் நடைபெற்ற 'பெட்டாலிங் ஜெயா பாதுகாப்பு குழு' (PKKPJ) நிதியுதவி வழங்கும் விழாவிற்குப் பிறகு, ஊடகங்களிடம் பேசிய அவர் இத்தகவல்களைப் பகிர்ந்து கொண்டார்.
மலேசியா இன்னும் முதியோர் சமுதாயத்தை எதிர்கொள்ள முழுமையாகத் தயாராகவில்லை என்றும், இதனால் முதியோர்களின் ஆரோக்கியம் குறித்து கவலை எழுவதாகவும் கம்போங் துங்கு தொகுதி மாநில சட்டமன்ற உறுப்பினர் லிம் யி வெய் அண்மையில் குறிப்பிட்டிருந்தார்.
அதற்குப் பதிலளிக்கும் வகையிலேயே மேயர் இந்த விளக்கங்களை அளித்தார். முதியோர்களின் ஆரோக்கியமான வாழ்க்கை முறையை ஊக்குவிக்கும் முயற்சிகள் முன்கூட்டியே தொடங்கப்பட வேண்டும் என்றும், முதியவர்கள் நவீன ஸ்மார்ட் தொழில்நுட்பங்களைப் பயன்படுத்த உதவும் வகுப்புகள் நடத்தப்பட வேண்டும் என்றும் லிம் யி வெய் கூறியிருந்தார்.
அதே வேளையில், உள்ளூர் வசதிகளை முதியோருக்கு உகந்ததாக மாற்றுவதற்கு மாநகராட்சியுடன் இணைந்து பல திட்டங்கள் தொடர்ந்து முன்னெடுக்கப்பட்டு வருவதையும் அவர் சுட்டிக்காட்டியிருந்தார்.
மாநகராட்சியால் நடைமுறைப்படுத்தப்பட்டு வரும் திட்டங்கள் குறித்து மேலும் பேசிய மேயர் ஜஹ்ரி சாமிங்கோன், பெட்டாலிங் ஜெயா நகரில் முதியோர் பராமரிப்பு மையங்களைத் (Elderly care centres) தொடங்க விரும்பும் நிறுவனங்களுக்கான நிலையான செயல்பாட்டு நடைமுறைகள் (SOP) மற்றும் விண்ணப்பச் செயல்முறைகளை மாநகராட்சி எளிமையாக்கியுள்ளதாகக் கூறினார்.
இத்தகைய பராமரிப்பு மையங்களை அமைக்க முன்வரும் நடத்துனர்களுக்கு மாநகராட்சி உரிய வழிகாட்டுதல்களை வழங்குவதோடு, அதற்கான அனுமதிகளைப் பெறுவதையும் விரைவுபடுத்தி உள்ளதாக அவர் விவரித்தார்.
மேலும், உலக சுகாதார நிறுவனத்தின் (WHO) முதியோருக்கு உகந்த நகரங்கள் மற்றும் சமூகங்களுக்கான உலகளாவிய அமைப்பில் (GNAFCC) பெட்டாலிங் ஜெயா மாநகராட்சி அதிகாரப்பூர்வமாகப் பதிவு செய்துள்ளது. இதன் மூலம், மாநகராட்சியின் முதியோர் மேம்பாட்டுத் திட்டங்களைச் சர்வதேசத் தரத்திற்கும், உலகளாவியச் சிறந்த நடைமுறைகளுக்கும் ஏற்ப இன்னும் சிறப்பாக வடிவமைக்க முடியும் என்று அவர் நம்பிக்கை தெரிவித்தார்.
கொள்கை ரீதியிலான மேம்பாடுகள் மட்டுமின்றி, எதிர்கால உள்கட்டமைப்பு மேம்பாட்டுத் திட்டங்களில் 'அனைவருக்குமான வடிவமைப்பு' (Universal design) கொள்கையை மாநகராட்சி உள்ளீடு செய்து வருகிறது. இதன் மூலம் முதியோர்கள் மற்றும் மாற்றுத்திறனாளிகள் பொது இடங்களை எவ்வித சிரமமுமின்றி எளிதாகப் பயன்படுத்த முடியும் என்று அவர் உறுதியளித்தார்.
நகரத்தின் அனைத்துப் பகுதிகளிலும் முதியோர்கள் மற்றும் மாற்றுத்திறனாளிகள் எளிதாக நடமாடுவதை உறுதி செய்யும் வகையில், சாய்தளப் பாதைகள் (Ramps) உள்ளிட்ட பல சிறப்பு வசதிகளை அமைப்பதற்குப் பெட்டாலிங் ஜெயா மாநகராட்சி முன்னுரிமை அளித்து வருகிறது.
இதன் வழி, அனைத்து வயது மற்றும் திறன்களைக் கொண்ட குடியிருப்பாளர்களும் உள்ளடக்கிய ஒரு வாழத்தகுந்த நகரமாகப் பெட்டாலிங் ஜெயா உருவெடுக்கும் என்று மேயர் டத்தோ முகமட் ஜஹ்ரி சாமிங்கோன் கூறினார்.
