கோலாலம்பூர், மே 22 - உலகளாவிய விநியோகத் சங்கிலி பாதிப்பு மற்றும் எரிசக்தி செலவினங்களின் உயர்வு ஆகியவற்றுக்கு மத்தியில், இந்த ஆண்டு டிசம்பர் மாதம் வரை மலேசியாவின் எரிசக்தி பாதுகாப்பை உறுதி செய்வதற்கான தீவிர முயற்சிகளில் அரசாங்கம் ஈடுபட்டுள்ளதாகத் துணைப் பிரதமர் டத்தோ ஸ்ரீ ஃபாடிலா யூசோப் தெரிவித்துள்ளார்.
தற்போதைய நிலையில் நாட்டின் எரிசக்தி விநியோகம் எதிர்வரும் ஜூலை மாதம் வரை போதுமானதாக உள்ள வேளையில், வெளிநாடுகளில் இருந்து கூடுதல் விநியோகத்தைப் பெறுவது உட்பட இந்த கால அவகாசத்தை மேலும் நீட்டிப்பதற்கான பணிகள் முடுக்கிவிடப்பட்டுள்ளன.
இன்று புத்ராஜெயாவில் நடைபெற்ற ஆற்றல் மாற்றம் மற்றும் நீர் மாற்று அமைச்சின் மாதாந்திர கூட்டத்தில் உரையாற்றிய அவர், தற்போதைக்கு ஜூலை வரை நாட்டின் எரிசக்தி விநியோகம் பாதுகாப்பாக உள்ளது என்றும், கூடுதல் விநியோகத்தைப் பெறுவதற்காகப் பெட்ரோனாஸ் (PETRONAS) நிறுவனம் ஆப்பிரிக்கா வரை சென்று அயராது உழைத்து வருவதாகவும் குறிப்பிட்டார்.
திட்டமிட்டபடி அனைத்து விநியோகங்களும் கிடைத்துவிட்டால், எதிர்வரும் டிசம்பர் மாதம் வரை நாட்டின் எரிசக்தி பாதுகாப்பை எங்களால் முழுமையாக உறுதி செய்ய முடியும் என்று அவர் நம்பிக்கை தெரிவித்தார்.
உலகளாவிய எரிசக்தி நெருக்கடியானது ஒட்டுமொத்த பொருளாதாரச் சங்கிலியையும், குறிப்பாக தளவாடத் துறையை (Logistics Sector) வெகுவாகப் பாதித்துள்ளதாகக் குறிப்பிட்ட துணைப் பிரதமர், இதனால் ஏற்பட்டுள்ள செலவின உயர்வு இறுதியாகப் பொருட்களின் விலைகளையும் அவற்றின் இருப்புகளையும் பாதிப்பதாக விளக்கினார்.
இந்த நெருக்கடியின் தாக்கம் பேக்கேஜிங்கிற்குப் பயன்படுத்தப்படும் பிளாஸ்டிக் போன்ற சில மூலப்பொருட்களின் பற்றாக்குறை காரணமாக, சுகாதாரம் மற்றும் உற்பத்தி உள்ளிட்ட பிற துறைகளிலும் எதிரொலிப்பதாக அவர் சுட்டிக்காட்டினார்.
மலேசியாவில் இன்னும் பலர் இந்த நிலைமையைத் சாதாரணமாக எடுத்துக் கொள்வதாகவும், நாடு எந்தவொரு நெருக்கடியையும் எதிர்கொள்ளவில்லை என்று நினைப்பதாகவும் கூறிய அவர், ஆனால் உண்மையில் மலேசிய மக்கள் தங்களது தற்போதைய வசதியான நிலையிலேயே நீடிப்பதை உறுதி செய்வதற்காகப் பல தரப்பினர் பின்னணியில் கடுமையாக உழைத்து வருகின்றனர் என்று தெரிவித்தார்.
எனவே, பொதுமக்கள் அனைவரும் மின்சாரம் மற்றும் தண்ணீரைச் சிக்கனமாகப் பயன்படுத்தி, ஆற்றல் நுகர்வைக் குறைப்பதன் மூலம் தங்களது பங்களிப்பை வழங்க வேண்டும் என்றும், இதன் மூலம் நமது எரிசக்தி விநியோகத்தின் காலத்தை நீட்டித்து, நெருக்கடியின் பாதிப்பிலிருந்து தப்பித்துக் கொள்ள முடியும் என்றும் அவர் வலியுறுத்தினார்.
மேலும், தேசிய பொருளாதாரச் செயல் கவுன்சிலின் வாராந்திர கூட்டங்களின் வாயிலாக, இந்த நெருக்கடி நாட்டின் பொருளாதாரம் மற்றும் தலையீடுகளில் ஏற்படுத்தும் தாக்கத்தை கண்டறிய அரசாங்கம் பல்வேறு துறைகளுடன் இணைந்து செயல்பட்டு வருவதாக அவர் கூறினார்.
சிறு மற்றும் நடுத்தரத் தொழில்துறைகளின் (SMEs) தொடர்ச்சியை உறுதி செய்தல், வேலை இழப்புகளைத் தடுத்தல் மற்றும் மக்கள் மீதான பாதிப்பைக் குறைத்தல் ஆகிய முயற்சிகளும் இதில் அடங்கும்.
இறுதிவரை நாட்டின் எரிசக்தி துறையில் விநியோகப் பாதுகாப்பு, மலிவு விலை மற்றும் சுற்றுச்சூழல் நிலைத்தன்மை ஆகிய மூன்று முக்கிய அம்சங்களுக்கு அரசாங்கம் தொடர்ந்து முன்னுரிமை அளிக்கும் என்றும் டத்தோ ஸ்ரீ ஃபாடிலா யூசோப் தனது உரையில் விவரித்தார்.
