ஷா ஆலம், ஏப்ரல் 20 - மேற்கு ஆசியாவில் நிலவும் போர் பதற்றம் மற்றும் ஷா ஆலம் விளையாட்டரங்கக் கட்டுமானப் பணிகள் இன்னும் முழுமையடையாத நிலையைக் கருத்தில் கொண்டு, 2026-ஆம் ஆண்டு சிலாங்கூரில் நடைபெறவிருக்கும் 22-வது மலேசிய விளையாட்டுப் போட்டியை (SUKMA) ஒத்திவைக்குமாறு சிலாங்கூர் சுல்தான் ஷாராஃபுடின் இட்ரிஸ் ஷா அல்ஹாஜ் பரிந்துரைத்துள்ளார்.
தற்போதைய சவாலான பொருளாதாரச் சூழலில், இத்தகைய பிரம்மாண்டமான விளையாட்டுப் போட்டியை நடத்துவதற்கு மிக அதிக அளவிலான நிதி ஒதுக்கீடு தேவைப்படுவதைச் சுட்டிக்காட்டிய சுல்தான் அவர்கள், இந்த முடிவை முன்மொழிந்துள்ளார்.
இன்று சிலாங்கூர் மாநில சட்டமன்றத்தின் 15-வது கூட்டத்தொடரின் நான்காவது அமர்வைத் தொடங்கி வைத்து உரையாற்றிய போதே சுல்தான் அவர்கள் இந்த முக்கிய கருத்தைப் பதிவு செய்தார்.
"தற்போதைய பொருளாதார நிலையைக் கவனிக்கும்போது, மத்திய கிழக்கு நாடுகளில் நிலவும் நெருக்கடி ஒரு முடிவுக்கு வரும் வரை மற்றும் ஷா ஆலம் விளையாட்டரங்கம் முழுமையாகக் கட்டி முடிக்கப்படும் வரை, இந்தப் போட்டியை ஒத்திவைப்பதே முறையானது என்று நான் கருதுகிறேன்," என அவர் குறிப்பிட்டார்.
கடந்த பிப்ரவரி 28 முதல் ஈரான் மீது இஸ்ரேல் மற்றும் அமெரிக்கா நடத்திய தாக்குதல்களும், அதனைத் தொடர்ந்து வளைகுடா நாடுகளில் உள்ள அமெரிக்க நலன்கள் மீது ஈரான் நடத்திய பதில் தாக்குதல்களும் உலகளவில் பெரும் பதற்றத்தை உருவாக்கியுள்ளன.
குறிப்பாக, உலக எண்ணெய் விநியோகத்தில் ஐந்தில் ஒரு பங்கு செல்லும் முக்கிய பாதையான ஹார்முஸ் நீரிணையை ஈரான் மூடியுள்ளதால் உலகப் பொருளாதாரம் பெரும் பாதிப்பைச் சந்தித்துள்ளது. அதே வேளையில், ஷா ஆலம் விளையாட்டு வளாக மறுசீரமைப்புத் திட்டம் 2029-ஆம் ஆண்டு வாக்கில் மட்டுமே முழுமையடையும் என எதிர்பார்க்கப்படுகிறது.
இருப்பினும், கடந்த ஏப்ரல் 9-ஆம் தேதி இளைஞர் மற்றும் விளையாட்டுத் துறை அமைச்சர் டாக்டர் முகமட் தவ்பிக் ஜோஹாரி தலைமையில் நடைபெற்ற சுக்மா உயர்மட்டக் குழுக் கூட்டத்தில், திட்டமிட்டபடி ஆகஸ்ட் 15 முதல் 24 வரை போட்டிகளை நடத்த முடிவு செய்யப்பட்டது.
மாநில விளையாட்டுத் துறை ஆட்சிக்குழு உறுப்பினர் நஜ்வான் ஹலிமி கலந்து கொண்ட அந்த கூட்டத்தில், தடகள வீரர்களின் தயார் நிலை மற்றும் ஏற்பாடுகள் குறித்து விரிவாக விவாதிக்கப்பட்டிருந்தது.
முன்னதாக, 2025 ஆகஸ்ட் 15-ஆம் தேதியன்று சிலாங்கூர் மந்திரி புசார் டத்தோ ஸ்ரீ அமிருடின் ஷாரி அவர்கள், "Rentak Kita, Aksi Kita" என்ற கருப்பொருளுடன் இப்போட்டிக்கான லோகோ மற்றும் 'வெள்ளை கழுகு' (Helang Putih) சின்னத்தை அறிமுகப்படுத்தியிருந்தார்.
37 வகையான விளையாட்டுப் போட்டிகளில் 474 நிகழ்வுகள், சிலாங்கூரின் 9 மாவட்டங்களில் உள்ள 53 இடங்களில் நடைபெறத் திட்டமிடப்பட்டிருந்தது.
2028-ல் கிளந்தானில் நடைபெறவிருக்கும் போட்டிக்குப் பிறகு சுக்மா போட்டிகளின் மேலாண்மை முறையில் புதிய மாற்றங்களைக் கொண்டுவர அமைச்சு திட்டமிட்டுள்ள சூழலில், சுல்தான் அவர்களின் இந்த ஒத்திவைப்பு ஆலோசனையானது மிகுந்த முக்கியத்துவம் வாய்ந்ததாகக் கருதப்படுகிறது.
