உலகளாவிய பொருளாதார நெருக்கடிக்கு மத்தியிலும் திட்டமிட்டபடி சுக்மா 2026 தொடரும்

ஷா ஆலம், ஏப்ரல் 9 - உலகளாவிய எரிசக்தி நெருக்கடி மற்றும் தற்போதைய பொருளாதார அழுத்தங்கள் போன்ற சவால்களை எதிர்கொண்ட போதிலும், 22-வது மலேசிய விளையாட்டுப் போட்டிகள் (சுக்மா) சிலாங்கூர் 2026, இந்த ஆண்டு ஆகஸ்ட் 15 முதல் 24 வரை திட்டமிட்டபடி தொடரும்.

இன்று இளைஞர் மற்றும் விளையாட்டுத்துறை அமைச்சர் டாக்டர் முகமது தௌபிக் ஜொஹாரி தலைமையில் நடைபெற்ற சுக்மா 2026 உயர்மட்டக் குழுக் கூட்டத்தில் இந்த முடிவு எட்டப்பட்டது.

இக்கூட்டத்தில் மலேசிய ஒலிம்பிக் மன்றத்தின் (MOM) தலைவர் டான் ஸ்ரீ டாக்டர் முகமது நூர்சா ஜக்காரியா, தேசிய விளையாட்டு மன்றத்தின் (MSN) தலைமை இயக்குநர் ஜெப்ரி நடிரின் மற்றும் சிலாங்கூர் மாநில இளைஞர், விளையாட்டு மற்றும் தொழில்முனைவர் ஆட்சிக் குழு உறுப்பினர் முகமட் நஜ்வான் ஹலிமி ஆகியோரும் கலந்து கொண்டனர்.

இந்த முடிவு குறித்து கருத்து தெரிவித்த டாக்டர் முகமட் தௌபிக், ஏற்பாட்டாளர்கள் மற்றும் மாநில விளையாட்டு வீரர்களின் தயார்நிலை உள்ளிட்ட அனைத்து அம்சங்களையும் முழுமையாக மதிப்பீடு செய்த பின்னரே இந்த முடிவு எடுக்கப்பட்டதாகக் கூறினார்.

"ஏற்பாட்டாளரான சிலாங்கூர் மாநில அரசாங்கம் மற்றும் ஒவ்வொரு மாநிலத்திலும் உள்ள விளையாட்டு வீரர்கள் ஏற்கனவே செய்துள்ள ஆயத்தப் பணிகளைக் கருத்தில் கொண்டு இந்த முடிவு எடுக்கப்பட்டுள்ளது," என்று அவர் கூறினார்.

போட்டிகளை ஒத்திவைப்பது ஏற்பாட்டாளர்களுக்கு மிகப்பெரிய நிதி தாக்கங்களை ஏற்படுத்தக்கூடும் என்றும் அவர் விளக்கினார். அதே நேரத்தில், செலவுகளைச் சேமிக்கும் நடவடிக்கையாக சிறிய அளவில் போட்டிகளை நடத்த சுக்மா உயர்மட்டக் குழு ஒப்புக்கொண்டுள்ளது.

இருப்பினும், இந்த அளவு குறைப்பு, போட்டியிடும் விளையாட்டுகளின் எண்ணிக்கையையோ அல்லது நிகழ்வுகளின் தரத்தையோ பாதிக்காது என்று அவர் வலியுறுத்தினார்.

நாட்டின் விளையாட்டு மேம்பாட்டு இலக்குகளைத் தியாகம் செய்யாமல், தற்போதைய பொருளாதார சவால்களைச் சமநிலைப்படுத்துவதற்கான சிறந்த அணுகுமுறையாக இந்த நடவடிக்கை பார்க்கப்படுகிறது.

"செலவுத் திறன் மற்றும் செலவுக் கட்டுப்பாட்டிற்கு முக்கியத்துவம் அளித்து, சுக்மா சிலாங்கூர் 2026 திட்டமிட்டபடி ஏற்பாடு செய்யப்படுவதை உறுதிசெய்ய சுக்மா உயர்மட்டக் குழு தொடர்ந்து கலந்துரையாடல்களை நடத்தும்," என்றார் அவர்.

இந்த ஈராண்டு விளையாட்டுப் போட்டி, புதிய திறமைகளைக் கண்டறிவதற்கும், மாநில மற்றும் தேசிய மட்டத்தில் விளையாட்டு வீரர்களின் மேம்பாட்டை வலுப்படுத்துவதற்கும் ஒரு முக்கிய தளமாக அமையும் என எதிர்பார்க்கப்படுகிறது.