சட்டம் 333-இல் ஜேபிஜே ஆய்வு; மது போதையில் வாகனம் ஓட்டுபவர்களுக்குக் கடுமையான தண்டனை

புத்ராஜெயா, ஏப்ரல் 3 : மது அல்லது போதைப்பொருள் தாக்கத்தின் கீழ் வாகனம் ஓட்டும் ஓட்டுநர்களுக்குக் கடுமையான தண்டனைகளை விதிக்க வகை செய்யும் சாலைப் போக்குவரத்துச் சட்டம் 1987 [சட்டம் 333]-இன் கீழ் உள்ள சில பிரிவுகளைச் சாலைப் போக்குவரத்துத் துறை (ஜேபிஜே) ஆய்வு செய்யத் தொடங்கியுள்ளது.

அதன் தலைமை இயக்குநர் டத்தோ ஏடி ஃபட்லி ரம்லி கூறுகையில், சாலைப் போக்குவரத்துச் சட்டம் 1987-இன் 44 மற்றும் 45-வது பிரிவுகளில் ஜேபிஜே-யின் சட்டப் பிரிவு மேல் ஆய்வைத் தொடங்கியுள்ளது என்றார்.

இந்த ஆய்வு செயல்முறை முதலில் மேற்கொள்ளப்பட்டு, பின்னர் போக்குவரத்து அமைச்சர் அந்தோணி லோக் மற்றும் போக்குவரத்து அமைச்சகத்தின் (MOT) கவனத்திற்குக் கொண்டு செல்லப்பட்டு இறுதி முடிவு எடுக்கப்படும் என்று அவர் கூறினார்.

“மது அருந்தி அல்லது போதைப்பொருள் உட்கொண்டு வாகனம் ஓட்டும் குற்றவாளிகளுக்கு எதிராகக் கடுமையான மற்றும் உறுதியான நடவடிக்கை எடுப்பதற்காக, சாலைப் போக்குவரத்துச் சட்டத்தின் 44 மற்றும் 45-வது பிரிவுகளை மறுபரிசீலனை செய்யுமாறு போக்குவரத்து அமைச்சர், அமைச்சுக்கும் ஜேபிஜே-வுக்கும் உத்தரவிட்டுள்ளார்,” என்று அவர் குறிப்பிட்டார்.

இங்கு நடைபெற்ற ஜேபிஜே பேரணிக்குப் பிறகு செய்தியாளர்களிடம் பேசிய அவர், மதுபோதையில் வாகனம் ஓட்டுவதற்கு எதிராக மிகவும் தீவிரமான விழிப்புணர்வு பிரச்சாரங்களுக்கு ஜேபிஜே தயாராகும் என்றார்.

பெரிய மற்றும் கடுமையான விபத்து வழக்குகளுக்காக ஒரு சிறப்பு நீதிமன்றத்தை உருவாக்கும் பரிந்துரை குறித்துக் கேட்டபோது, சாலைப் பாதுகாப்பு குறித்த பொது விழிப்புணர்வை அது மேம்படுத்தும் என்பதால் ஜேபிஜே அந்தப் பரிந்துரையை வரவேற்பதாக ஏடி ஃபட்லி கூறினார்.

“ஒரு தனி நீதிமன்றத்தை உருவாக்குவதற்கான முடிவு எடுக்கப்பட்டால் நாங்கள் அதை வரவேற்கிறோம், ஆனால் அதில் நிதி, மனித வளம் போன்ற பல தாக்கங்கள் ஏற்படும் என்பதை நாங்கள் புரிந்துகொள்கிறோம். சிறப்பு நீதிமன்றத்தை அமைக்க அரசாங்கம் முடிவு செய்தால், நாங்கள் அதை மிகவும் வரவேற்போம்," என்று அவர் மேலும் கூறினார்.

பாதிக்கப்பட்டவர்களின் குடும்பத்தினருக்குக் கட்டாய இழப்பீடு வழங்குவது உட்பட, சாலைப் போக்குவரத்துச் சட்டம் 1987-இன் 44-வது பிரிவில் மேலதிக திருத்தங்களை அமைச்சு உருவாக்கி வருவதாகக் கடந்த திங்கட்கிழமை லோக் கூறியிருந்தார்.

மார்ச் 29 அன்று, சிலாங்கூர், கிள்ளான், ஜாலான் ராயா பாராட்டில் நடந்த விபத்தில் மோட்டார் சைக்கிளோட்டி ஒருவர் உயிரிழந்தார். இரண்டு நாட்களுக்குப் பிறகு, காஜாங்-செமினி மாற்றுச் சாலையில் நடந்த மற்றொரு சம்பவத்தில் குழந்தை உட்பட ஆறு பேர் காயமடைந்தனர். இவ்விரு சம்பவங்களிலும் மது போதையில் ஓட்டுநர்கள் ஈடுபட்டதாகச் சந்தேகிக்கப்படுகிறது.

- பெர்னாமா