ஷா ஆலம், மார்ச் 15: புனித ரமலான் மாதத்தை முன்னிட்டு, அம்பாங் ஜெயா நகராண்மை கழகமும் சிலாங்கூர் இளைஞர் சமூக அமைப்பும் (SAY) இணைந்து ஏற்பாடு செய்த 'ரமலான் வருகை 2026' திட்டத்தின் கீழ், பண்டான் ஜெயாவில் உள்ள 'ரூமா கித்தா' நல்வாழ்வு மற்றும் கல்வி அமைப்பின் குடியிருப்பாளர்களுக்குச் சிறப்பு உதவிகள் வழங்கப்பட்டன.
பண்டான் ஜெயா, ஜாலான் பண்டான் 8-இல் அமைந்துள்ள இந்த இல்லத்தில் நடைபெற்ற இந்நிகழ்வில், சிலாங்கூர் இளவரசர் ராஜா மூடா தெங்கு அமீர் ஷா மற்றும் இளவரசி டத்தின் படுகா அஃப்சா ஃபடினி டத்தோ அப்துல் அஜிஸ் ஆகியோர் நேரில் கலந்து கொண்டு சிறப்பித்தனர்.
ரமலான் மாதத்தில் தேவையுள்ள மக்களுக்குத் துணை நிற்பதோடு, அரசு முகமைகளுக்கும் பொதுமக்களுக்கும் இடையிலான உறவை வலுப்படுத்துவதே இத்திட்டத்தின் முக்கிய நோக்கம் என்று அம்பாங் ஜெயா நகராண்மை கழகம் தனது முகநூல் பதிவில் குறிப்பிட்டுள்ளது.
இந்நிகழ்வின் ஒரு பகுதியாக, நன்கொடையாளர் தரப்பிலிருந்து சிறப்புரை ஆற்றப்பட்டதைத் தொடர்ந்து, 'ரூமா கித்தா' இல்லத்திற்கும் மற்றும் சில நல அமைப்புகளுக்கும் நன்கொடை காசோலைகள் மற்றும் பெருநாள் பணம் (duit raya) ஆகியவை வழங்கப்பட்டன.
இந்தச் சமூக நலத் திட்டத்தின் அடையாளமாக மரம் நடும் நிகழ்வும் நடைபெற்றது. இதில் இளவரசர் தெங்கு அமீர் ஷாவின் சகோதரி தெங்கு டத்தின் படுகா செத்தியா சதாஷா கலந்து கொண்டு மரக்கன்றுகளை நடும் நிகழ்வில் கலந்து கொண்டார். இறுதியாக, இளவரசர் தெங்கு அமீர் ஷா அந்த இல்லத்தின் சுற்றுச்சூழலைப் பார்வையிட்டதோடு, அங்கிருந்த குடியிருப்பாளர்களுடன் தனிப்பட்ட முறையில் கலந்துரையாடி அவர்களுக்கு உற்சாகமளித்தார்.
