டெக்சஸ், டிச 10 - ஒரு நாட்டைப் புரிந்துகொள்வதற்கான எளிதான வழிகளில் உணவும் ஒன்றாகும். மேலும் இந்திய உணவு வகைகள் எப்போதும் அதன் பன்முகத்தன்மையால் தனித்து நிற்கின்றன என்பதில் ஐயமில்லை.
பாரம்பரியத்தையும் சுவையையும் இணைக்கும் இந்திய உணவுகள் உலகின் சிறந்த 15 உணவுகளில் ஒன்றாக தேர்ந்தெடுக்கப்பட்டுள்ளன. TasteAtlas வெளியிட்டுள்ள உலகின் மிகச் சிறந்த 100 உணவுகள் பட்டியலில், இந்திய உணவுகள் 13-ஆவது இடத்தைப் பிடித்துள்ளன.
பல்வேறு சுவைகள் மற்றும் தனித்துவமான மசாலா கலவைகளால் உலகளவில் பிரபலமான இந்திய உணவுகள், 5-க்கு 4.43 மதிப்பெண்களைப் பெற்றுள்ளன. அதில் பட்டர் சிக்கன், பட்டர் கார்லிக் நான், ஹைதராபாத் பிரியாணி, மசாலா தோசை, பரோட்டா போன்ற உணவுகள் உலகின் சிறந்த உணவுப் பட்டியலிலும் இடம்பெற்றுள்ளன.
மேலும், இந்திய உணவுகளிலேயே பட்டர் கார்லிக் நான் 4.7 புள்ளிகளைப் பெற்ற வேளை, தென்னிந்தியாவில் புகழ்பெற்ற பரோட்டா 4.6 மதிப்பெண்களைப் பெற்றுள்ளது.
இந்த பட்டியலில் பீட்சா உள்ளிட்ட இத்தாலிய உணவுகள் 4.64 புள்ளிகளைப் பெற்று உலகளவில் முதலிடத்தைப் பிடித்துள்ளன என்பது குறிப்பிடத்தக்கது.
