தெலுக் இந்தான், செப் 11: கடந்த ஜூலை மாதம் முதல் வாட்ஸ்அப் மூலம் வெளிநாட்டவரைச் சந்தித்து காதல் மோசடியில் ஏமாற்றப்பட்ட வழக்கறிஞருக்கு 17.5 லட்சம் ரிங்கிட் இழப்பு ஏற்பட்டது.
மேலும், 58 வயதான அப்பெண் வழக்கறிஞர் தான் ஏமாற்றப்பட்டதை உணர்ந்து நேற்று காவல்துறையில் புகார் அளித்தார் என பேராக் காவல்துறைத் தலைவர் டத்தோ அசிசி மாட் அரிஸ் கூறினார்.
“அந்தப் பெண்ணின் கூற்றுப்படி, சந்தேக நபர் கடல் புவியியலாளராக வேலை செய்வதாகக் கூறி, திரங்கானுவில் கடலோரத் தொட்டி கட்டுமானத் திட்டத்தை செயல்படுத்த மலேசியா வந்தபோது கொள்ளையடிக்கப்பட்டதன் விளைவாக தனது பணத்தை இழந்ததாகக் கூறப்படுகிறது.
"அவர் எதிர்கொள்ளும் 'பிரச்சனை' காரணமாக, சந்தேக நபர் ஒரு தொகையை டெபாசிட் செய்ய பாதிக்கப்பட்டவரின் உதவியைக் கேட்டார்," என தெரிவித்த பேராக் காவல்துறைத்தலைவர், மோசடி குற்றங்கள் மற்றும் தற்போதைய குற்றப் போக்குகள் குறித்த அமர்வில் கலந்து கொண்ட பின்னர் செய்தியாளர் கூட்டத்தில் அசிசி இவ்வறு கூறினார்.
பாதிக்கப்பட்டவர் பல்வேறு வங்கி கணக்குகளுக்கு மொத்தம் RM1,757,490 பணப் பரிவர்த்தனைகளை செய்துள்ளதாக அசிசி கூறினார்.
"சந்தேக நபர் பணத்தை திருப்பி தருவதாக உறுதியளித்தார். ஆனால், இன்று வரை பாதிக்கப்பட்டவர் சந்தேக நபரிடமிருந்து பணம் எதுவும் பெறவில்லை," என்று அவர் கூறினார்.
மோசடி செய்ததற்காக குற்றவியல் சட்டப் பிரிவு 420 இன் கீழ் வழக்கு விசாரிக்கப்பட்டது என்றார்.
இதற்கிடையில் இந்த ஆண்டின் முதல் ஏழு மாதங்களில் , ஹிலிர் பேராக் மாவட்டம் இணைய மோசடியுடன் தொடர்புடைய RM2 மில்லியன் இழப்புகளைப் பதிவு செய்துள்ளதாக பேராக் காவல்துறைத்தலைவர் அசிசி கூறினார்.
– பெர்னாமா
